Yay məktəbində faydalı bir gün
Məktəbimizdə yay məktəbinin işi davam edir. Hər səhər bir qayda olaraq şagirdlərlə idman müəllimləri musiqi sədaları altında idman hərəkətlərini numayiş etdirirlər. Hər gün dərslər fənn müəllimləri tərəfindən əvvəlcədən müəyyənləşdirilmiş proqram əsasında keçirilir. Dərslərin müəyyən qismi açıq havada keçirilir, müəllimlər şagirdlərdə motivasiya yaradan müxtəlif təlim üsullarından istifadə edirlər. İbtidai sinif müəllimləri Məlahət Həsənova və Zülfiyyə Məmmədova I-ci sinif şagirdləri ilə "Nağıllar aləminə səyahət" mövzusunda maraqlı oyun keçirdilər. Həmin nağıllar əsasında şagirdlər rəsmlər çəkmiş və nağıl qəhrəmanlarının obrazlarını düzəldiblər. Bununla bərabər I-ci sinif şagirdləri ilə sinif müəllimi Naidə Əliyeva "İrsimiz" mövzusunda söhbət aparıb. Bu mövzuda aparılan söhbətlər şagirdlərdə milli irsimizə bağlılıq ruhu yaradıb. 5 ”B” sinfində E.Porterin “Polyana “əsərinin mütaliəsi keçirilib. Azərbaycan dili və ədəbiyyat müəllimi Təranə Bağırova şagirdlərə qrup işi verib. Şagirdlər əsərdəki əsas obrazları təhlil edib, eyni zamanda əsərə öz münasibətlərini bildiriblər. Günün sonunda fiziki tərbiyə müəllimləri Toğrul Quluzadə və Rauf Abbasovun iştirakı ilə 3 “C” və 3 “D” sinif şagirdləri maraqlı bir estafet nümayiş etdirdilər. Nəticədə dostluq qalib gəldi.
