“Hər xeyirxahlıq iz buraxır” – İngilis dilində açıq dərs
23 aprel 2025-ci il tarixində 96 nömrəli tam orta məktəbin 7”B”sinfində İngilis dili fənnindən maraqlı və düşündürücü bir açıq dərs keçirilib. Dərsi məktəbin İngilis dili müəllimi Səbinə Cəfərova tədris edib. Dərs mövzusu “Each Kindness” olub.
Dərsin əsas məqsədi şagirdlərdə empatiya, xeyirxahlıq və sosial məsuliyyət kimi insani dəyərləri inkişaf etdirməklə yanaşı, onların İngilis dili üzrə oxuyub-anlama, danışıq və ifadə bacarıqlarını stimullaşdırmaq olub.
Dərs zamanı müəllim interaktiv tədris metodlarından istifadə edərək şagirdlərə xeyirxahlığın insan münasibətlərindəki gücünü və hər bir yaxşılığın cəmiyyətə təsirini anladıb. Dərs mətnindən çıxarılmış hissələrin müzakirəsi, şagirdlərin şəxsi fikirlərini bölüşməsi və qrup işi vasitəsilə təqdimatları dərsi daha da maraqlı və mənalı edib.
Açıq dərsi Təlim-tərbiyə işləri üzrə direktor müavini Mahirə Rüstəmova dinləyib və dərsin həm pedaqoji quruluşu, həm də tərbiyəvi mahiyyəti ilə bağlı müsbət rəy bildirib. O, dərsin təkcə dil bacarıqlarını deyil, həm də şagirdlərin sosial-emosional inkişafını dəstəklədiyini qeyd edib.
Bu cür dərslər məktəbdə şagirdlərin həm akademik, həm də mənəvi baxımdan formalaşmasına mühüm töhfə verir. Məktəb rəhbərliyi tərəfindən müəllim Səbinə Cəfərovaya təşəkkür bildirilmiş, dərsdə iştirak edən şagirdlərin fəallığı və marağı xüsusi qiymətləndirilmişdir.
