96 №-Lİ TAM ORTA MƏKTƏB

26 iyun Beynəlxalq Narkotiklərlə mübarizə günüdür. Bu günlə əlaqədar 07 06.2023-cü il tarixdə məktəbin fəaliyyət planında nəzərdə tutulduğu kimi narkotiklərin insan orqanizminə məhvedici təsiri, törətdiyi sosial bəlalar, həmçinin narkomanlığın cəmiyyətə və insanların sağlamlığına ziyanı barədə şagirdləri məlumatlandırmaq məqsədi ilə onlarla görüş təşkil edilib. Məktəbin təşkilatçısı Nigar Süleymanova və psixoloqu Sevinc Abdullayeva təhsilalanlara narkomaniyanın cəmiyyətə mənfi təsiri, doğurduğu fəsadlar və ona qarşı aparılan mübarizə metodları barədə məlumat veriblər. Çıxış edənlər şagirdlərə izah ediblər ki, yeniyetmə və gənclərin sağlam həyat tərzinin yeganə yolu mənəvi saflıq və fiziki sağlamlıqdır. Uşaqlara müraciət edərək: "Gəlin birlikdə planetimizin ən qlobal problemlərindən birinə çevrilən, gənclərimizi ölümün ağuşuna alan, cəmiyyətimizin mənəvi və intellektual potensialının aşınmasına səbəb olan, genofondumuza sarsıdıcı, ağır və sağalmaz zərbələr vuran bu bəlaya – narkomaniyaya “YOX” deyək. Öz ailəmizi, əzizlərimizi, çevrəmizi, ümumilikdə xalqımızı bu bəladan qoruyaq. Bu bəlaya düçar olmuş və ondan əziyyət çəkən vətəndaşlarımızı isə cəmiyyətdən təcrid etməyək, əksinə onlara öz yardım əlimizi uzadaq." deyiblər.

07.06.2023-cü il tarixdə 96 nömrəli məktəbin rəhbərliyi bu tədris ilinin sonunda yaşa görə təqaüdə çıxmağa, məktəbdən ayrılmağa hazırlaşan 96 ailəsinin 3 əməkdarı ilə görüş keçirib. İlk öncə məktəbin ibtidai sinif müəllimi Məhbubə Kazımovaya həmkarları və rəhbərliyin ürək sözləri ünvanlanıb. Daha sonra riyaziyyat müəllimlərinin əhatəsində məktəbin riyaziyyat müəllimləri İsmətxanım Həmzəyeva və Gümüş Şəfiyeva ilə duyğulu anlar yaşanıb. Həyatının böyük bir hissəsini, ömrünün ən yaddaqalan illərini 96 nömrəli məktəbin sinif otaqlarında, dəhlizlərində , müəllimlər otağında keçirmiş bu ziyalı, müəllimliyin haqqını əməkləri, öz yetirmələri ilə vermiş bu fədakar təhsil fədailəri rəhbərlik tərəfindən uzun illər 96 nömrəli məktəbdə həyata keçirdikləri səmərəli pedaqoji fəaliyyətlərinə görə təşəkkürnamə ilə təltif olunublar. Görüş çay süfrəsi arxasında səmimi söhbət formatında davam edib.

İnsan hüquq və azadlıqlarının təmin edilməsi müasir dünyada demokratik inkişafın ayrılmaz hissəsinə, bəşəriyyətin mənəvi-hüquqi və siyasi ideallarının ali təzahürünə çevrilməklə, vətəndaş cəmiyyətinin yetkinliyinin başlıcа meyarı sayılır. İnsan hüquqları ləyaqət, ədalət, bərabərlik, hörmət və müstəqillik kimi ortaq dəyərlərə əsaslanır. Bu dəyərlər qanunla müəyyən edilir və qorunur. Bütün sivil dövlətlərdə ümumi qayğı və məsuliyyət predmeti kimi nəzərdən keçirilən bu meyarlar müstəqil Azərbaycan Rеspublikаsının ictimai-siyasi həyatında da özünə möhkəm yer tapıb.

18 iyun Azərbaycan Respublikasında İnsan hüquqları günü kimi qeyd olunur. Dövlət başçısı cənab İlham Əliyevin 2007-ci il 18 iyun tarixli Sərəncamı ilə ümummilli liderimiz Heydər Əliyev tərəfindən 1998-ci il iyunun 18-də Azərbaycan Respublikasında ilk "İnsan hüquqları müdafiəsinə dair Dövlət Proqramı"nın təsdiq edildiyi və insan hüquqlarının təmin olunmasının dövlət siyasətinin əsas istiqamətlərindən biri kimi müəyyən edildiyi nəzərə alınaraq iyunun 18-i Azərbaycan Respublikasında İnsan Hüquqları Günü kimi təsis edilib. Bu günün əhəmiyyəti barədə, eləcə də, cəmiyyətdə öz hüquqlarının tanınması və qorunması istiqamətində şagirdlərin maarifləndirilməsi üçün 96 nömrəli məktəbdə təşkil edilmiş tədbirdə məktəbin təşkilatçısı Nigar Süleymanova və psixoloqu Sevinc Abdullayeva təhsilalanlara geniş və ətraflı məlumat veriblər. Şagirdlərə mövzu ilə əlaqəli maraqlı video material da təqdim olunub.

Bakı Şəhəri üzrə Təhsil İdarəsinin təşəbbüsü ilə bu tədris ilində təşkil edilmiş "Biliyini paylaş" layihəsinə 96 nömrəli tam orta məktəbin iki müəllimi də qoşulmuşdur. Məktəbimizin əməkdar fizika müəllimi Sevda Əsgərli "Oynayaraq öyrənək", ibtidai sinif müəllimi Lalə Mustafayeva isə "Layihə əsaslı dərslərdə qiymətləndirmə üsulları" adlı metodiki ideya ilə "Biliyini paylaş" layihəsinin iştirakçıları olub. Sevindirici haldır ki, hər iki müəllimimiz layihənin qalib müəllimləri kimi təltifolunma mərasiminə dəvət olunaraq, diplomlarla təltif olunublar. Bu seminarlarda iştirak edən və layihə rəhbərlərinin təcrübələrindən faydalanan digər müəllimlərimiz - Çiçək Daşdəmirova, Xanım Ələkbərova, Ceyran İsayeva, Təranə Möhsünova və Fəridə İsgəndərli isə təşəkkürnamə ilə təltif olunublar. Məktəb rəhbərliyi qalib müəllimlərimizlə görüşüb, onları təbrik edib,uğurlar arzu edib.Müəllimlərlə xatirə fotosu çəkilib.

Bakı Şəhəri üzrə Təhsil İdarəsinin tabeliyindəki ümumi təhsil müəssisələrində 1 İyun-Uşaqların Beynəlxalq Müdafiəsi Günü ilə əlaqədar tədbirlər keçirilib.

Paytaxt məktəblərində təşkil olunan tədbirlərdə Uşaqların Beynəlxalq Müdafiəsi Günü haqqında şagirdlərə məlumat verilib. Bildirilib ki, 1950-ci il iyunun 1-də BMT Baş Assambleyası tərəfindən Uşaqların Beynəlxalq Müdafiəsi Gününün qeyd olunması qərara alınıb. Vurğulanıb ki, Azərbaycanda hər zaman uşaqların müdafiə olunması və onlara qayğı göstərilməsi istiqamətində çoxsaylı işlər görülür.

Tədbirlərdə çıxış edənlər Ulu Öndər Heydər Əliyevin uşaqlara olan diqqət və qayğısından danışıblar. Qeyd olunub ki, ölkə Prezidenti İlham Əliyevin uşaqların savadlı, sağlam və firavan böyüməsi, rifahının yüksəldilməsinə göstərdiyi qayğı və diqqət deməyə əsas verir ki, bu məsələ dövlət siyasətinin başlıca istiqamətlərindən biridir.

Eyni zamanda tədbirlərdə şagirdlər Azərbaycan və dünya xalqlarına məxsus mahnılar oxuyub, rəqslər ifa edib, şeirlər söyləyib və ədəbi-bədii kompozisiyalar nümayiş etdiriblər.

Bundan əlavə, tədbirlərdə Uşaqların Beynəlxalq Müdafiəsi Gününə həsr olunan fotostendlərə, şagirdlərin əl işlərindən ibarət sərgilərə baxış keçirilib.