“Fövqəladə hallar zamanı davranış qaydaları” mövzusunda maarifləndirmə tədbiri
14 mart 2025-ci il tarixində Fövqəladə Hallar Nazirliyinin Bakı Regional Mərkəzinin əməkdaşları 96 nömrəli məktəbdə IX, X və XI sinif şagirdləri üçün “Fövqəladə hallar zamanı davranış qaydaları” mövzusunda maarifləndirmə tədbiri keçiriblər.
Tədbirin əsas məqsədi şagirdlərə fövqəladə hallar zamanı düzgün davranış qaydalarını öyrətmək, onların təhlükəsizlik biliklərini artırmaq və fövqəladə vəziyyətlərdə necə hərəkət etməli olduqları barədə məlumatlandırmaq olub.
FHN nümayəndələri təbii fəlakətlər, yanğınlar, zəlzələlər, qaz sızmaları, texnogen qəzalar və digər fövqəladə hadisələr zamanı təhlükəsizlik tədbirləri haqqında geniş məlumat veriblər. Şagirdlərə təxliyə qaydaları, ilkin tibbi yardım və fövqəladə vəziyyətlərdə özünüqoruma üsulları praktik nümunələrlə izah edilib.
Tədbirin interaktiv formatda keçirilməsi şagirdlərin mövzuya marağını daha da artırıb. Onlar suallar verərək fövqəladə hallar zamanı hansı addımları atmalı olduqlarını daha yaxşı anlamağa çalışıblar.
Tədbirin sonunda FHN əməkdaşları şagirdlərə təhlükəsizlik qaydalarına həmişə riayət etməyin vacibliyini vurğulayıb və belə maarifləndirmə tədbirlərinin davam etdiriləcəyini bildiriblər. Məktəb rəhbərliyi və şagirdlər Fövqəladə Hallar Nazirliyinin əməkdaşlarına təşəkkür edərək, bu cür tədbirlərin onların bilik və bacarıqlarını artırmaq baxımından böyük əhəmiyyət daşıdığını qeyd ediblər.
