Süleyman Rəhimovun 125 illik yubileyinə həsr olunmuş dəyirmi masa
19 mart 2025-ci il tarixində 96 nömrəli tam orta məktəbdə IX sinif şagirdlərinin iştirakı ilə görkəmli yazıçı Süleyman Rəhimovun anadan olmasının 125 illik yubileyinə həsr olunmuş dəyirmi masa keçirilib. Tədbirin təşkilatçısı Nigar Süleymanova, iştirakçıları isə kitabxana müdiri Ofelya İsmayılova, kitabxanaçı Təranə Cəfərova, ədəbiyyat müəllimi Elnarə Rəsulova və sinif rəhbəri Samirə Kərimova oldular.
Dəyirmi masanın əsas məqsədi Azərbaycan ədəbiyyatının görkəmli nümayəndələrindən biri olan Süleyman Rəhimovun həyat və yaradıcılığı haqqında şagirdlərin məlumatlılığını artırmaq, onun əsərlərinin milli ədəbiyyatımızdakı yerini və əhəmiyyətini müzakirə etmək olub.
Tədbiri giriş sözü ilə kitabxana müdiri Ofelya İsmayılova açaraq, Süleyman Rəhimovun Azərbaycan ədəbiyyatına verdiyi töhfələrdən danışıb. O, yazıçının “Şamo”, “Saçlı”, “Mehman” kimi əsərlərinin Azərbaycan nəsrinin inkişafında mühüm rol oynadığını vurğulayıb.
Daha sonra kitabxanaçı Təranə Cəfərova yazıçının yaradıcılıq yolundan bəhs edərək, onun sosialist realizmi janrında yazılmış əsərlərinin dövrün ideoloji-siyasi hadisələrini əks etdirdiyini qeyd edib.
Ədəbiyyat müəllimi Elnarə Rəsulova Süleyman Rəhimovun xüsusilə “Şamo” romanında və digər əsərlərində qəhrəman obrazlarını necə yaratdığı və onların cəmiyyət üçün nə ifadə etdiyi haqqında maraqlı fikirlər səsləndirib.
Sinif rəhbəri Samirə Kərimova isə Süleyman Rəhimovun ədəbiyyatda maarifçilik missiyasını önə çəkərək, onun gənc nəslə vətənpərvərlik ruhu aşılayan yazıçı olduğunu qeyd edib.
Şagirdlər isə tədbir boyunca yazıçının əsərlərindən oxuduqları parçalar əsasında onun personajlarının xarakteri, cəmiyyətə təsiri və dövrün reallıqları haqqında fikirlərini bölüşüblər.
Dəyirmi masa maraqlı müzakirələrlə yekunlaşıb. Şagirdlər Süleyman Rəhimovun yaradıcılığı ilə daha yaxından tanış olmaq imkanı əldə ediblər və ədəbiyyatımızın dəyərli simalarından birini daha dərindən anlamaq şansı qazanıblar.
Sonda tədbirin təşkilatçısı Nigar Süleymanova iştirakçılara təşəkkür edərək, belə tədbirlərin gənclərin ədəbiyyata marağının artırılmasına böyük töhfə verdiyini bildirib.
Qeyd edib ki, bu cür tədbirlərin keçirilməsi şagirdlərin bədii düşüncəsini inkişaf etdirmək və milli ədəbiyyatımızın dəyərli irsini gələcək nəsillərə ötürmək baxımından mühüm əhəmiyyət kəsb edir.
