Son zəng
14 iyun 2025-ci il tarixində Respublikamızın bütün ümumtəhsil məktəblərində olduğu kimi E.Cəlilov adına 272 nömrəli tam orta məktəbdə də “Son zəng” tədbiri keçirilib. Son zəng hər bir insanın həyatında əlamətdar, yadda qalan günlərdən biridir. Son zəng gələcək həyata çağırışdır. Müstəqil həyatın başlanğıcıdır. Əl-əlvan şarlarla, bayraqlarla bəzədilmiş məktəb həyətində onbirinciləri məzun olmaları münasibətilə təbrik etmək üşün müəllimlər, şagirdlər, valideynlər toplaşmışdılar.
Tədbirdə məktəbin direktoru Anar Mustafazadə, Nizami Rayon Icra Hakimiyyətinin əməkdaşı Mənsum İsmayılov, əməkdar artist Elnur Əhmədov, 44 günlük Vətən Müharibəsində şəhid olan, məktəbin məzunu Məmmədov Murad Elşən oğlunun anası Şərqiyyə Məmmədova, məktəbin məzunu olan qaziləri, müəllim kollektivi və valideynlər iştirak ediblər.
Tədbir dövlət himninin sədaları ilə açıq elan edilib. Azərbaycan ərazisində Vətən müharibəsində qəhrəmancasına döyüşmüş, ölkəmizin ərazi bütövlüyü yolunda canlarını fəda etmiş bütün şəhidlərimizin xatirəsi bir dəqiqəlik sükutla yad edilib.
Məktəbin direktoru Anar müəllim sevinc və həyəcan içində olan məzunları təbrik edib və gələcək həyatlarında uğurlar arzulayıb.
Nizami Rayon İcra Hakimiyyətinin əməkdaşı Mənsum İsmayılov “Son zəng” münasibətilə onbirinciləri təbrik edib, onlara müstəqil Azərbaycanın layiqli vətəndaşları olmağı, bilik və zəhmətləri sayəsində nailiyyətlərini daha da artırmağı arzulayıb. Məzunların həyatında yeni mərhələnin açıldığını deyən Mənsum müəllim onların hər birinin ölkəmizin gələcək inkişafı naminə həyata keçiriləcək proseslərdə fəal iştirak edəcəklərinə inandığını bildirib.
Tədbirdə çıxış edən müəllimlər məzunlara bundan sonra qədəm qoyacaqları müstəqil həyatlarında müvəffəqiyyətlər arzulayıblar və onlara olan etimadı hər zaman doğrultmağı tövsiyə ediblər.
Mərasim şagirdlərin hazırladıqları çıxışlarla davam etdirilib.
Sonda simvolik “Bilik açarı” məzunlar tərəfindən X sinif şagirdlərinə təqdim olunub, “Son zəng” çalınıb, səmaya əlvan şarlar buraxılıb.
