Azərbaycan Dövlət Pedaqoji Universitetində "Açıq qapı günü"
Mayın 17-də Azərbaycan Dövlət Pedaqoji Universitetində (ADPU) bu ali məktəbə daxil olmaq istəyən abituriyentlər üçün “Açıq qapı günü” keçirilib.
“Açıq qapı günü”nün keçirilməsinin məqsədi abituriyentləri ADPU-ya qəbul qaydaları və tədris prosesi ilə tanış etmək idi.
“Açıq qapı günü”ndə məktəbin direktoru Mehparə Mansırova, təlim-tərbiyə işləri üzrə direktor müavini Kəklik Böyükkişiyeva, uşaq birliyi rəhbəri Zülfinaz Abasova və 10-11-ci sinif şagirdləri iştirak edib. Onlara universitetin yaranma tarixi, keçdiyi böyük və şərəfli inkişaf yolu, həmçinin bu ali təhsil müəssisəsinin müasir vəziyyəti barədə geniş məlumat verilib.
Bildirilib ki, ADPU zəngin maddi-texniki bazaya, güclü elmi-pedaqoji kadr potensialına malikdir. Dekanlar rəhbərlik etdikləri fakültələrin fəaliyyəti, kafedraları, müəllim və tələbələri, elmi-tədqiqat laboratoriyaları, eləcə də keçirilən ictimai-mədəni tədbirlər barədə ətraflı məlumat verib, abituriyentləri müəllim peşəsini seçməyə çağırıblar.
Sonda şagirdlərin sualları cavablandırılıb.
