“Ölkəmizi tanıyaq” devizi altında ekskursiya
Azərbaycan Respublikasının Prezidenti İlham Əliyevin tapşırığına əsasən respublikamızın şəhər və rayonlarının IX-XI sinif şagirdləri üçün “Ölkəmizi tanıyaq” devizi altında maarifləndirici tur-aksiyalar keçirilir.
Martın 23-də Pirallahı rayonunun ümumtəhsil məktəblərinin 27 nəfər əlaçı şagirdi üçün Naxçıvan Muxtar Respublikasına ekskursiya turu təşkil olunub. Ekskursiyada həmçinin məktəbin 6 nəfər şagirdi iştirak edib. Yolasalma mərasimində Pirallahı Rayon İcra Hakimiyyəti başçısı Vasif İmanov, RİH əməkdaşları, məktəb direktorları, valideynlər, KİV və ictimaiyyət nümayəndələri iştirak ediblər.
Rayon İcra Hakimiyyətinin başçısı Vasf İmanov çıxışında tədbir iştirakçılarını salamlayaraq, dövlət başçısının tapşırığına əsasən “Ölkəmizi tanıyaq” devizi altında keçirilən maarifləndirici tur aksiyanın mahiyyəti haqqında danışdı və bildirdi ki, layihə məktəblilərin dünya görüşünün daha da zənginləşməsinə, gənclərin vətənpərvərlik ruhunda tərbiyə olunmasına çox böyük töhfələr verəcəkdir. Qeyd edilib ki, tur-aksiya ərzində qrup rəhbəri ilə əlaqə saxlanılır və şagirdlərlə mütəmadi maraqlanılır. Məktəblilərin sağlamlığının və təhlükəsizliyinin qorunması üçün lazımi tədbirlər görülür.
Mərasim başa çatdıqdan sonra rayonun ümumtəhsil məktəblərinin IX-XI sinif şagirdləri Bakı-Naxçıvan reysi ilə uçmaq üçün Heydər Əliyev Beynəlxalq Hava Limanına yola salındılar. Hava Limanında Naxçıvan şəhərinə gedən şagirdlər Novruz Bayramı münasibəti ilə təşkil edilmiş konsert proqramını izlədilər. Dörd gün davam edəcək tur-aksiya çərçivəsində Naxçıvan Muxtar Respublikasının ərazisində tarixi abidələri, görməli yerləri, sosial-iqtisadi inkişafı ilə yaxından tanış olacaqlar.
Qeyd edək ki, “Ölkəmizi tanıyaq” tur aksiyalarının əsas məqsədi ölkəmizin tarixinin, mədəniyyətinin, adət-ənənələrinin, müstəqillik illərində əldə edilmiş nailiyyətlərinin dərindən öyrənilməsidir və bu məqsədlə respublikamızın müxtəlif şəhər və rayonlarında yaşayan gənclərin digər bölgələrə səyahətləri təşkil olunur.
