Xocalı Faciəsinin 24-cü ildönümü - "Xocalı – dərdim mənim"
25. 02. 2016-cı il tarixində məktəbimizin akt zalında Xocalı faciəsinin 24-cü ildönümü ilə əlaqədar olaraq "Xocalı – dərdim mənim" adlı anım tədbiri keçirilmişdir. Azərbaycan Respublikasının Dövlət Himninin səslənməsi ilə başlayan tədbir, Azərbaycanın bütövlüyü uğrunda şəhid olmuş həmvətənlərimizin əziz xatirəsinin 1 dəqiqəlik sükutla yad edilməsi ilə davam etmişdir. Sonra məktəbin direktoru Mikayılov Şakir çıxış edərək Xocalı faciəsini erməni silahlı qüvvələrinin bəşər tarixində xalqımıza, millətimizə qarşı işlətmiş olduqları soyqırım cinayəti kimi xarakterizə etmişdir. O, bu amansız və qəddar soyqırım aktının insanlıq tarixində ən qorxulu kütləvi terror olduğunu bildirmişdir. Daha sonra çıxış edən məktəbin tarix müəlliməsi Sadıqova Səkinə Xocalı faciəsinin dinc əhaliyə qarşı törədilmiş soyqırımı cinayətlərinin miqyasına görə ən dəhşətlisi olduğunu vurğulayaraq, bu soyqırım aktı nəticəsində bəzi ailələrin bütünlüklə məhv edildiyini, mülki əhalinin görünməmiş qəddarlıqla qətlə yetirildiyini, əsir götürülənlərə isə amansız işgəncələr verildiyini bildirib. O, Xocalı faciəsi barədə dünya ictimaiyyətinə dolğun və geniş məlumatlar verilməsində Heydər Əliyev Fondunun vitse-prezidenti Leyla Əliyevanın təşəbbüsü ilə fəaliyyət göstərən “Xocalıya ədalət” beynəlxalq kampaniyası çərçivəsində Ermənistanın həyata keçirdiyi insanlıq əleyhinə cinayətin beynəlxalq miqyasda ifşası istiqamətində xeyli işlər görüldüyünü, Xocalı faciəsinin soyqırım olması faktının dünyanın bir sıra ölkələrinin və beynəlxalq təşkilatların qərar və qətnamələrində əksini tapdığını tədbir iştirakçılarının diqqətinə çatdırıb.Anım tədbirinin rəsmi hissəsindən sonra şagirdlərin ifasında faciəyə həsr edilən şeirlər səsələndirilmiş, musiqili bədii kompozisiyalar təqdim edilmişdir. Bu kompozisiyalarda şagirdlər Xocalı faciəsinin təkcə bir şəhərin deyil, bütövlükdə insanlığın faciəsi olduğunu nəzərə çatdırmağa çalışırdılar.Bədii hissənin yekununda şəhid jurnalist, Xocalı həqiqətlərinin dünyaya çatdırılmasında əvəzsiz xidmətləri olan Çingiz Mustafayevə həsr edilən videoçarx nümayiş etdirilmişdir.
