"20 Yanvar faciəsi" heç vaxt unudulmayacaq!
Təhsil Nazirliyinin əmri ilə təsdiqlənmiş “20 Yanvar faciəsinin 29-cu ildönümünün keçirilməsi barədə Tədbirlər Planı”na və Bakı Şəhəri üzrə Təhsil İdarəsinin müvafiq əmrinə əsasən "20 Yanvar–Ümumxalq Hüzn Günü"nə həsr edilən bir sıra tədbirlər məktəbin fəaliyyət planında öz əksini tapmışdır. Tədbirlərin keçirilməsində məqsəd şagirdlərdə vətənə məhəbbət hissini daha da möhkəmləndirmək, onları vətənə layiqli övlad kimi yetişdirilmək və əsil vətəndaş mövqeyini məktəblilərə çatdırmaqdır.
Yanvarın 16-da "20 Yanvar faciəsi"nin 29-cu ildönümü ilə əlaqədar məktəbin akt zalında “20 Yanvar faciəsi xalqımızın qəhrəmanlıq salnaməsidir” adlı tədbir keçirilib. İlk olaraq şəhidlərimizin xatirəsi bir dəqiqəlik sükutla yad edilib. Sonra məktəbin tərbiyə işləri üzrə direktor müavini Rəhimova Sevda "20 Yanvar faciəsi" şəhidlərinin Vətənin azadlığı uğrunda gedən döyüşlərdə göstərdiyi şücaətlərdən, qəhrəmanlıqlardan danışıb. O, öz çıxışında 20 Yanvar 1990-cı ildə keçmiş sovet dövlətinin Azərbaycan xalqına qarşı həyata keçirdiyi hərbi təcavüzün insanlığa qarşı törədilmiş ən ağır cinayətlərdən biri olduğunu, milli azadlıq və ərazi bütövlüyü uğrunda mübarizəyə qalxmış onlarla günahsız insanın qətlə yetirildiyini və yaralandığını qeyd edib. Hazırlanmış əbədi-bədii kompozisiyada şagirdlər şeirlər söyləyib, mahnılar ifa ediblər.
Daha sonra foyedə faciəni əks etdirən IX-XI sinif şagirdlərinin rəsm əsərlərinə və sərgilənən kitablara baxış keçirilib.
Yanvarın 19-da məktəbin 9 b sinfinin rəhbəri Hacıyeva Natəvan şagirdləri 20 Yanvar şəhidlərini ziyarət etmək üçün Şəhidlər Xiyabanına aparıb. H. Natəvan Şəhidlər Xiyabanına onlarla müəllimin şagirdləri ilə gəldiklərini görəndə çox qürur hissi keçirtdiyini söyləyib.
Yanvarın 19-da həmçinin 3 c sinfinin rəhbəri İsmayılova Pərvanə şagirdlərini Pirallahı rayonunda yerləşən "Vətən uğrunda " abidə kompleksini ziyarət etməyə aparıb. Şagirdlər abidə önünə qərənfillər düzüblər.
