Voleybol komandamız rayon birincisi oldu
Bildiyimiz kimi, Azərbaycan Respublikası Təhsil Nazirliyi, Azərbaycan Respublikası Gənclər və İdman Nazirliyi, Azərbaycan Respublikası Milli Olimpiya Komitəsi və Azərbaycan Məktəb İdmanları Federasiyasının “Məktəblər arasında respublika çempionatı”nın keçirilməsi haqqında əmrlərinə əsasən məktəblərdə voleybol (qızlar), basketbol (oğlanlar), şahmat və atletika idman növləri üzrə yarışlar keçirilməlidir. Yarışların keçirilməsində məqsəd məktəblilər arasında bədən tərbiyəsi və idmanı təbliğ etmək, sinifdənxaric və məktəbdənkənar fəaliyyət sahəsində ümumitəhsil məktəblərinin fəaliyyətlərini qiymətləndirmək, məktəblilərdən ibarət yığma komandaların heyətini müəyyənləşdirmək, qalib məktəblərin idmançılarının aidiyyatı beynəlxalq yarışlarda iştirakını təşkil etməkdir.
Noyabrın 12-də 168 nömrəli tam orta məktəbdə Pirallahı zonası üzrə voleybol birinciliyi keçirilib. Yarışda 168,186, 235 və 243 nömrəli məktəbin voleybol komandaları iştirak edib. Yarışı Milli Olimpiya Komitəsinin və baş hakimlər kollegiyasının hakimləri idarə edib. Hakimlərin qərarına əsasən 168 nömrəli tam orta məktəbin komandası I yeri qazanıb. II yeri 243, III yeri isə 186 nömrəli məktəblərin komandaları tutub. Təşkilat komitəsi tərəfindən voleybol komandasının məşqçisi Nizami Abdullayevə diplom verilib.
