“Bilik günü” qeyd olunub
Sentyabrın 15-də bütün ümumi təhsil məktəblərində olduğu kimi bizim məktəbdə də “Bilik günü” keçirilib. Tədbirdə YAP Pirallahı rayon Təşkilatının sədri Hikmət Şikarov, Pirallahı rayon Ağsaqqallar Şurasının sədri Fazil Məmmədov, məktəb rəhbərliyi, valideynlər, müəllim və şagird kollektivi iştirak edib. Tədbir Azərbaycan Respublikasının Dövlət himninin səsləndirilməsi ilə başlanıb.
Tədbiri məktəbin direktoru Mehparə Mansırova açıq elan edib. O, ilk olaraq tədbir iştirakçılarını salamlayıb, “Bilik günü” münasibətilə məktəbin müəllim və şagird kollektivini təbrik edib, yeni dərs ilində onlara uğurlar arzulayıb. Çıxışında vurğulayıb ki, dövlətimiz, dövlət başçımız daima gənc nəslin təhsilinə önəm verir, ona diqqət və qayğı göstərir.
Mehparə Mansırova ötən tədris ilində məktəbin, müəllim və şagirdlərin əldə etdikləri uğur və nailiyyətləri haqqında tədbir iştirakçılarına məlumat verib. Belə ki, məktəbin Azərbaycan dili və ədəbiyyat müəllimi Sevda Alxasova təhsildəki xidmətlərinə görə Cənab Prezidentimiz İlham Əliyevin müvafiq sərəncamına görə “Tərəqqi” medalı ilə təltif olunub. İbtidai sinif müəllimi Aynurə Balayeva bir neçə müsabiqədə iştirak edərək qalib olub. 2017-2018-ci tədris ilinin qəbul imtahanlarında 3 nəfər 600-dən çox, 7 nəfər 500-dən çox bal toplayıb. Həmçinin Pirallahı rayonu üzrə ən yüksək nəticəni 687 balla Azərbaycan Tibb Universitetinin Müalicə işi fakültəsinə qəbul olmuş Məmmədzadə Leyla Teyyub qızı göstərib.
Sonra söz YAP Pirallahı rayon Təşkilatının sədri Hikmət Şikarova verilib. O, əlamətdar gün münasibətilə müəllim və şagird kollektivini təbrik edib, yeni dərs ilində onlara uğurlar arzulayıb. H.Şikarov öz çıxışında Ulu öndərin müəllimlik peşəsinə aid söylədiyi kəlamlardan da sitat gətirib. XI sinif şagirdlərinə bəzi tövsiyyələr verib, onlara yüksək nəticələr göstərməyi arzulayıb. Bir qrup müəllim H.Şikarov tərəfindən Fəxri fərmanlarla təltif olunub. Gənc nəslin təlim-tərbiyəsində xidmətlərinə görə Əmirova Xırdaxanım, Beynəlxalq konfransda iştirakına görə İsmayılova Sədaqət, YAP-da fəallığa görə Rüstəmova Zəhra və Zeynalova Failə Fəxri fərmanlara layiq görülüb.
Daha sonra yüksək bal toplayan məzunların valideynləri övladlarının üzərində əməyi olan müəllimlərə, məktəb rəhbərliyinə dərin minnətdarlıqlarını bildiriblər.
Tədbir şagirdlərin hazırladıqları musiqi, rəqs, şeir və kompozisiyalarla davam edib. Sonda ilk zəng çalınıb. Simvolik “Bilik Açarı” I sinif şagirdlərinə təqdim olunub. Tədbirə XI sinif şagirdlərinin ifasındakı kompozisiya ilə yekun vurulub.
