Şagirdimizin qalibiyyəti
Azərbaycan Respublikası Təhsil Nazirliyinin razılığı ilə Rusiya FR Müstəqil Dövlətlər Birliyi, Xaricdə Yaşayan Həmvətənlərlə İş və Beynəlxalq Humanitar Əməkdaşlıq üzrə Federal Agentliyin (“Russotrudnichestvo”) Azərbaycan nümayəndəliyi tərəfindən 2017-2018-ci tədris ilinin yanvar-may aylarında Bakı şəhərində “X Respublika rus dili və ədəbiyyatı olimpiadası” həyata keçirilib.
Fevralın 3-də Pirallahı və Xəzər rayonlarında fəaliyyət göstərən ümumtəhsil məktəblərinin VII-VIII sinif şagirdləri məktəbimizdə keçirilən olimpiadada iştirak ediblər.
İyunun 6-da Bakı Slavyan Universitetində “X Rus dili və ədəbiyyatı Olimpiadası”nın yekunlarına həsr olunmuş möhtəşəm tədbir keçirilib. Tədbirdə Azərbaycan Respublikası Təhsil Nazirinin müavini Firudin Qurbanov, Bakı Slavyan Universitetinin rektoru Nurlana Əliyeva, Rusiya İnformasiya Mədəniyyət Mərkəzinin sədri Denisov Valentin Petroviç, Yakunina Valentina Timofeyevna, Təhsil Nazirliyi və Bakı Şəhəri üzrə Təhsil İdarəsinin tabeliyində olan məktəb direktorları, müəllimlər və qalib olan şagirdlər iştirak ediblər. Tədbirdə çıxış edənlər azərbaycanlı şagirdlərin savad və biliyini xüsusi qeyd edib, onların rus dilini mükəmməl bildiklərini vurğulayıb, belə olimpiadaların əhəmiyyətini dəyərləndiriblər. Onlar qeyd ediblər ki, digər keçmiş SSRİ respublikalarından fərqli olaraq, Azərbaycanda rus dilinə və ədəbiyyatına olan münasibət əvvəlki kimi qalmışdır. Bütün bunlar Azərbaycanda təhsilin səviyyəsinin, respublikamızda rus dilinə münasibətin yüksək olmasının təzahürüdür. Bu isə, öz növbəsində, Azərbaycan ilə Rusiya arasında olan əlaqələrin daha da möhkəmlənməsinə və inkişaf etməsinə şərait yaradacaqdır.
Respublika turunda qalib olan 170 nəfər məktəblinin sırasında məktəbimizin 8 a sinif şagirdi Həsənov Kamran da yer alıb. Mükafatlandırılma zamanı olimpiada qaliblərinə, məktəb direktorlarına diplom, təşəkkürnamə və hədiyyələr təqdim olunub.
Biz də öz növbəmizdə Kamranı təbrik edir, onun üzərində əməyi olan müəllimlərimizə təşəkkür edirik.
