"Elimizə Bahar gəlir" adlı möhtəşəm tədbir keçirilib
Martın 13-də akt zalında məktəbin direktoru Mansırova Mehparə, tərbiyə işləri üzrə direktor müavini Rəhimova Sevda, ibtidai sinif müəllimləri Əmirova Xırdaxanım və Muradova İradə tərəfindən təşkil olunmuş “Elimizə bahar gəlir” adlı möhtəşəm tədbir keçirilib. Akt zalı Novruz Bayramını tərənnüm edən zəngin əşya, eksponat, qədim xalçalar, qablar və digər bəzəklərlə tərtib olunub.Tədbirdə Bakı Şəhəri üzrə Təhsil İdarəsinin aparıcı məsləhətçisi Rövşən Əliyev, Milli Elmlər Akademiyasının Folklor İnsititunun şöbə müdiri folklorşünas alim Elxan Məmmədli, Aşıqlar Birliyinin üzvləri Cahangir Əliyev və Altay Məmmədli, Pirallahı Rayon İcra Hakimiyyətinin nümayəndələri Vüsal Babayev, Azad Namazov, Ağsaqqallar Şurasının sədri Fazil Məmmədov, 4 nömrəli Uşaq-Gənclər İnkişaf Mərkəzinin nümayəndəsi Sevda Bəşirova, Pirallahı məktəblərinin direktorları və müavinləri, məktəb kollektivi, valideynlər iştirak ediblər.
Tədbirin birinci hissəsi çərşənbələrin, Novruz atributlarının canlı nümayişi ilə başlanıb və möhtəşəm kompozisiya şəklində təqdim olunub.
İkinci hissə isə Novruz adət ənənələrini tərənnüm edən tamaşa və səhnəciklərlə davam edib.
Tədbirdə iştirak edən aşıq qonaqların canlı çıxışları tədbirə ahəng qatıb. Qonaqlar tədbirin yüskək səviyyədə keçirilməsində əməyi olan başda Mehparə xanım olmaqla kollektivə öz minnətdarlıqlarını bildiriblər. Onu da qeyd ediblər ki, məktəblərdə belə tədbirlərin keçirilməsi alqışa layiqdir. Məclisdə iştirak edən qonaqların xoş sözləri unudulmaz anlar yaradıb.
