Beynəlxalq məktəb kitabxanaları günü qeyd olundu
23 oktyabr 2017-ci il tarixində Beynəlxalq məktəb kitabxanaları günü münasibətilə 168 nömrəli tam orta məktəbdə məktəbin kitabxana müdiri Məmmədxanova Gülxatın, ibtidai sinif müəllimləri Muradova İradə və Əmirova Xırdaxanım tərəfindən tədbir təşkil olunub.Tədbirin əvvəlində məktəbin direktoru Mansırova Mehparə öz çıxışında kitabların, məktəb kitabxanasının şagirdlərin və müəllimlərin həyatındakı rolu haqqında geniş məlumat verdi.O, qeyd etdi ki, məktəb kitabxanası şagirdlərin axtardıqları məlumatları tapmağa müvəffəq olduqları bir məkandır. Sonra kitabxana müdiri Məmmədxanova Gülxatın çıxış edərək qeyd etdi ki, məktəbimizin zəngin kitabxanası var. Kitabxanamız kompüter və internetlə təmin olunub. Kitabxanamızda şagirdlərin mütaliə vərdişlərinin təkmilləşdirilməsi və onlarda mütaliə mədəniyyətinin formalaşdırılması üçün şərait yaradılmışdır. Hətta müəllimlər sinifdənxaric oxu dərslərini bəzən kitabxanada keçirirlər. Hər bir şagirdin kitabxananı müqəddəs bir yer –mənəviyyat, zəka, bilik mənbəyi hesab etməsi üçün var qüvvəmizlə çalışırıq. Daha sonra 2 a və 3 a sinif şagirdlərinin sinif rəhbərləri və valideynlərinin köməyi ilə hazırladıqları “ Mənim sevimli kitabım” başlığı altında əl işləri, maketlər, inşalar təqdim olundu.Tədbir böyük maraqla izlənildi.Bu gün uşaqların yaddaşında kitab bayramı kimi qaldı.
