1 "C" sinfinin hesabat tədbiri keçirildi
2016-2017-ci dərs ilinin son günlərini yaşadığımız bir zamanda sinif rəhbəri İsmayılova Pərvanənin rəhbərliyi və təşkilatçılığı ilə 1 "C" sinif şagirdlərinin buraxılış tədbiri keçirildi. Birincilər bu gün həyatda ən vacib addımlardan birini atdılar. Biz onların birinci dəfə səhnədə çıxışlarının şahidi olduq. Sinif rəhbəri Pərvanə müəllimə və şagirdlər bu bayramın maraqlı keçməsi üçün əllərindən gələni əsirgəməmişdilər. Məktəbə yenicə qədəm basmış birincilər böyük inam və sevinclə müəllim və valideynləri qarşısında çıxış etdilər. Valideynlərə övladlarının böyük auditoriya qarşısında çıxışına tamaşa etmək çox xoş idi. Şagirdlər onlara aşılanan vətənpərvərlik hissini, ana dilinin müqəddəsliyini, Azərbaycanın aydın gələcəyinin məsuliyyətinin onların üzərində olduğunu öz şeirləri, “Vətən nəğməsi” səhnəciyi, mahnıları ilə nümayiş etdirdilər. Tədbirin gedişatı zamanı nümayiş olunan “Dədə Qorqud və Cırtdan”, “ Sehirli Xalat”, “Buratino və Malvina” adlı səhnəcikləri, rəqslər tədbirə dəvət olunan Pirallahı Rayon İcra Hakimiyyətinin nümayəndələri və məktəbimizin rəhbərliyi, pedaqoji heyəti tərəfindən xüsusi maraq və alqışlarla qarşılandı. Tədbirdə çıxış edən qonaqlar bu möhtəşəm tədbirin həqiqətən onlara keçmişi, öz uşaqlıq illərini xatırlatdığını, tədbirdən, şirin-şəkər balaların çıxışlarından xüsusi zövq aldıqlarını vurğuladılar. Səhnənin gözəl bəzədilməsi, səhnəciklərin, çıxışların nəfis tərtibatı ciddi hazırlıq işlərinin aparılmasından xəbər verirdi. Tədbirin sonunda klounun çıxışı, “ Köpük və alov” şou uşaqları çox əyləndirdi. Pirallahı Rayon İcra Hakimiyyətinin nümayəndəsi Hikmət müəllimin uşaqlara hədiyyəsi olan tort körpələrimizin böyük sevincinə səbəb oldu.
