Yeni tədris ilinə hazırlıq
Məzuniyyətlərini yekunlaşdıraraq yeni, 2015/2016-cı tədris ilinə böyük həvəs, yüksək enerji ilə hazırlaşan, özlərini müvafiq bilik, bacarıq və vərdişlərlə silahlandıran pedaqoji kollektivimizin üzvləri 28.08.2015-ci il tarixindən tam heyətlə artıq işə qayıdıblar. Müəllimlərimiz ikinci evləri, doğma məkanları olan əziz məktəbin sevimli şagirdlərinin gəlişinə tam hazır olması məqsədilə artıq ikinci iş günlərində kütləvi iməclik aksiyası keçiriblər. Belə ki, bu gün məktəbimizdə həyata keçirilən iməclik prosesində məktəbin bütün pedaqoji heyəti fəal iştirak edib, bu işə böyük həvəs və diqqətlə yanaşıbdır. İməclik zamanı məktəbin həyətyanı torpaq sahəsi alaq otlarından, zir-zibildən azad olunmuş, ağacların dibləri bellənərək yumşaldılmış, qazon örtüyünə yeni güllər əkilmiş, suvarılmış, məktəbdaxili ərazi abadlaşdırılmışdır. Məktəbimizdə bu cür nəcib aksiyalar dərs ilinin başlanması ərəfəsindən start götürərək mütamadi olaraq bütün tədris ili ərəfəsində daim müəllim, şagird, valideyn və texniki işçi heyətinin iştirakı ilə keçirilir.
