Beynəlxalq sertifikata layiq görülən müəllimimiz - Alxasova Sevda
Azərbaycan təhsili günü-gündən inkişafdadır. Məktəbimizin sağlam bünövrəsi, qızıl sütunları olan müəllimlərimiz də təhsilimizin inkişaf tempinə uyğun olaraq daim öz üzərlərində çalşır, savad, dünyagörüşü bilik dairələrini mütəmadi olaraq zənginləşdirirlər. Yay ayları olmasına baxmayaraq müəllimlərimizin böyük bir hissəsi öz məzuniyyətlərini dincəlmək əvəzinə təkmilləşdirmə, ixtisasartırma, eləcə də yerli və beynəlxalq səviyyəli kurslarda, təlimlərdə özlərini qarşıdan gələn yeni tədris ilində həyata keçirəcəkləri işlərə dair müvafiq bilik, bacarıq və vərdişlərlə silahlandırmaqdadırlar. Belə müəllimlərimizdən biri də Pirallahı rayonunda öz işi, bacarığı, elmi potensialı ilə yaxşı tanınan Azərbaycan dili və Ədəbiyyat müəllimimiz Alxasova Sevdadır. Belə ki, Sevda müəllimə Azərbaycan Respublikasının Təhsil Problemləri İnstitutunun (ARTPİ) təşkilatçılığı ilə respublikanın təhsil işçiləri üçün “Pedaqoji kadrların peşəkarlığının yüksəldilməsi: mənəvi dəyərlərə əsaslanan təhsil” mövzusunda keçirilən seminarda iştirak etmişdir. İyulun 1-dən 4-nə qədər keçirilən seminarın hər günü üçün Danimarkanın Kopenhagen şəhərindəki ESSE İnstitutunun direktoru, professor Marianna Meyer, direktorun müavini, Petra Fon Kalinovski və institutun təlimçisi, pedaqogika üzrə fəlsəfə doktoru Anita Fridrixin məruzələrinin dinlənilməsi həyata keçirilmişdir. Beynəlxalq təlimçilər seminar zamanı “Ümumbəşəri dəyərlərə əsaslanan təhsil: inteqral təhsil”, “Ümumbəşəri dəyərlərə əsaslanan təhsil fəlsəfəsi: “Edukea” konsepsiyası”, “Müəllim ümumbəşəri dəyərlərin nümunəsi kimi”, “Ümumbəşəri dəyərlər - sevgi, həqiqət, əxlaq, əmin-amanlıq, qeyri-zorakılıq”, “Edukea” üzrə yaradıcılıq məşğələsi”, “Təhsil sahəsində layihələr”, “Metodların xülasəsi”, “İnsan emalatxanası”, “Uşaqlar üçün layihə: mən kiməm”, “Ətraf mühit və sevgi mədəniyyəti” mövzularında məruzələrlə çıxış etmişlər. Seminarın yekununda Alxasova Sevdaseminardakı iştirakına və yüksək səviyyəli çıxışlarına görə seminar təşkilatçıları tərəfindən Beynəxlaq sertifikatla mükafatlandırılmışdır. Sevda müəlliməni bütün kollektivimiz adından təbrik edir, uğurlarının davamlı olmasını arzulayırıq.
