Pirallahıda şair Baba Vəziroğlu ilə görüş keçirilib
Günü-gündən gözəlləşən, inkişaf edən əziz yurdumuz qədim Pirallahıda rayon icra hakimiyyəti rəhbərliyinin, Bakı Şəhər Mədəniyyət və Turizm Baş İdarəsinin nümayəndələrinin, rayonda fəaliyyət göstərən idarə və müəssisələrin əməkdaşlarının, məktəblilərin iştirakı ilə tanınmış nasir, şair, tərcüməçi, kinodramaturq, Əməkdar İncəsənət Xadimi Baba Vəziroğlu ilə görüş keçirilib. Vaqif Mustafazadə adına Mədəniyyət Mərkəzində baş tutmuş tədbirdən öncə iştirakçılar şairin kitablarından ibarət sərgi ilə tanış olublar. Görüşdə Pirallahı məktəblilərinin ifasında şairin “Taleyimdən keçən gün”, “Nəyi gözləyirsən”, “Kim bilir”, “Bu axşam”, “Hava”, “Gözüm səni axtaracaq”, “Dəniz”, “Xatirələr” şeirləri səsləndirilib. VIII sinif şagirdlərimizin ifasında səsləndirilən, məktəbimizin tərbiyə işləri üzrə direktor müavini Rəhimova Sevdanın rəhbərliyi ilə şairin şeirlərinin motivləri əsasında hazırlanmış səhnəcik bütün tədbir iştirakçılarının böyük marağına səbəb olaraq, hər kəsdə xoş təəssüratlar oyatmışdır. Tədbirin gedişatı prosesində əməkdar İncəsənət Xadimi Şeyx Əbdül Mahmudov, Xalq Artisti Mübariz Tağıyev, bəstəkar Sevinc Tofiqqızı çıxışlarında şairin nəsr və nəzm sahəsində qazandığı uğurlardan söz açıblar, “Səhər qatarı”, “Yaddan çıxan görüş”, “Ocaq”, “Yol”, “Dünya dəyməz göz yaşına” kimi kitabların ədəbiyyatımıza dəyərli töhfə olduğunu bildiriblər.Sonda şairə yaradıcılığında yeni-yeni uğurlar arzulayan Pirallahı Rayon İcra Hakimiyyətinin başçısı Vasif İmanov onu Fəxri fərmanla mükafatlandırmış və rayonun simvolunun maketini təqdim etmişdir.
