“Olimpiya Hərəkatı” layihəsi çərçivəsində voleybol üzrə rayon birincisi olduq
“Olimpiya Hərəkatı” idman proqramı Beynəlxalq Olimpiya Komitəsi və Olimpiya Oyunlarının Ümumdünya tərəfdaşı olan Coca-Cola şirkəti, Azərbaycan Respublikası Milli Olimpiya Komitəsi, Təhsil Nazirliyi, Gənclər və İdman Nazirliyinin birgə tərəfdaşlığı ilə artıq ikinci ildir ki, icra olunur. Proqramın əsas məqsədi “Bakı 2015” Birinci Avropa Oyunlarının sosial və idman irsini davam etdirərək məktəbliləri yüngül atletika, veloidman, basketbol (3x3), voleybol və badminton idman növləri üzrə keçiriləcək məktəb və şəhər yarışlarına cəlb etmək, şagirlərə sağlam və aktiv həyat tərzini, həmçinin Olimpiya dəyərlərini təşviq etməkdən ibarətdir. “Olimpiya Hərəkatı” proqramı müntəzəm şəkildə fiziki fəaliyyətə cəlb etməklə uşaqların, həmiçinin onların valideynlərinin fiziki aktivliyinin artmasına təkan verir. Azərbaycan Respublikası Təhsil Nazirliyinin, Milli Olimpiya Komitəsinin, Gənclər və İdman Nazirliyinin “Olimpiya Hərəkatı” layihəsi çərçivəsində keçirilən məktəblilərin Bakı şəhər birinciliyində Pirallahı Rayonunun məktəbliləri ikinci ildir ki, öz fəallıqları və geniş miqyaslı uğurları ilə fərqlənirlər. Badminton, Velosiped, Atletika və Basketbol üzrə Pirallahı Rayon üzrə keçirilən idman növlərində şagirdlərimizin uğurları daim bizi sevindirir. Belə ki, bu il şagirdlərimiz hərəkat çərçivəsində keçirilən idman yarışlarında Basketbol üzrə rayon birinciliyinə layiq görüldükdən sonra, velosiped yarışları üzrə də rayon məktəbləri arasında birincilik qazanaraq müvafiq kubok, fəxri fərman və medallarla mükafatlandırılmışlar. Bundan əlavə şagirdlərimiz, qaçış üzrə də fərqlənərək rayon ikinciliyinə layiq görülüblər. Şagirdlərimizin çoxsaylı uğurlarında idman müəllimlərimizin xidmətləri böyük rol oynayır. Öz işinin öhdəsindən yüksək peşəkarlıqla gələn müəllimlərimiz şagirdlərimizin uğur yoluna daim işıq saçan, düzgün istiqamət göstərən mayak rolunu məharətlə ifa etməkdə davam edirlər. Məktəbimizin direktoru Mikayılov Şakir qalib komandanın heyət üzvləri və məktəbin idman müəllimi Abdullayev Nizami müəllimlə görüş keçirərək komanda üzvlərinə məktəbimizin adını yüksəklərə qaldıraraq bizə qələbə sevincini yaşatdıqlarına görə dərin minnətdarlığını bildirmiş, onlara ən xoş arzularını ünvanlayaraq uğurlarının davamlı, sonsuz olmasını arzu etmişdir.
