Gül Bayramına hazırlıq
Azərbaycan xalqının ümummilli lideri, dünya şöhrətli siyasi xadim Heydər Əliyevin anadan olmasının 92 illik yubileyi münasibətilə artıq uzun zamandır ki, rayonumuzun müəssisə və təşkilatları, mədəniyyət, təhsil ocaqlarında hazırlıq işləri gedir. Pirallahı Rayon İcra Hakimiyyətinin təşkilatçılığı ilə həyata keçirilən, hər bir rayon sakininin səbrsizliklə və böyük maraqla gözlədiyi əl işləri sərgisinə hazırlıq işləri məktəbimizdə artıq yekunlaşmışdır. Qeyd edək ki, sərgidə nümayiş olunacaq və Gül bayramının adına müvafiq olaraq güllərdən hazırlanmış bütün nümunələr məktəbimizin müəllim, valideyn, şagird kollektivinin birgə fəaliyyətinin, fantaziya zənginliyinin və incə estetik zövqünün, qeyri adi əl qabiliyyətinin məhsuludur. Bütün bunlarla yanaşı, hər bir əl işinin hazırlanmasında məktəbin tərbiyə işləri üzrə direktor müavini Rəhimova Sevdanın tapşırıqlarının, təklif və məsləhətlərinin planlı şəkildə və qruplarla hazırlanan əl işlərinin vaxtında yekunlaşdırılımasında böyük əməyi olmuşdur. Hazırlanan bütün əl işlərində ulu öndər, dahi siyasətçi, Heydər Əliyevin həyat və fəaliyyətini, onun mədəni irsini, eləcə də respublikamızın ictimai siyasi həyatının, mədəniyyət və incəsənətinin əsas atributlarını əks etdirmək kollektivimiz üçün bir mayak, ana xətt rolunu oynamışdır. Qeyd edək ki, sözü gedən bayram şənliyi və sərgi may ayının 4-də Pirallahı Rayonunun Gənclər Parkında baş tutacaqdır. Yeri gəlmişkən kollektivimizin ən dəyərli üzvü, müəllim və şagirdlərimizin sevimlisi olan direktorun tərbiyə işləri üzrə müavini vəzifəsində çalışaraq böyükdən kiçiyə hər birimizdən öz qayğısını əsirgəməyən Sevda müəlliməni sabahkı doğum günü münasibətilə bütün kollektivimiz adından təbrik edir, ona uzun ömür, can sağlığı, işlərində uğurlar, bütün arzularının həyata keçməsini arzulayırıq. Həmişə var olun Sevda müəllimə.
