Şagirdimiz beynəlxalq idman yarışının qalibi oldu
2015-2016-cı tədris ili məktəbimiz üçün çox uğurlu olmuşdur. Belə ki, il ərzində şagirdlərimizin möhtəşəm uğurları daim bizi sevindirmiş, qəlbimiz fərəhdən, fəxrdən dağa dönmüşdür. Ən sevindirici, təqdirəlayiq hal isə odur ki, qürur mənbələrimizin uğurları birtərəfli deyil hər tərəfli olmuş, təhsil sahəsindən tutmuş idmana qədər geniş əhatə dairəsinə malik olmuşdur. 2016-cı ilin son ayında əziz şagirdimiz Balaməmmədov İbrahim Rusiyanın Moskva şəhərində keçirilən 12-13 yaşlı yeniyetmələr arasında 47 kq çəki üzrə beynəlxalq karate yarışında fərqlənərək III yerin qalibi olmuş, medal və fəxri diplomla mükafatlandırılmışdır. Onun bu uğuru başda sevimli direktorumuz Mikayılov Şakir cənabları olmaqla 168 saylı məktəb ailəsinin hər bir üzvünün sevincinə səbəb olmuşdur. Bu münasibətlə hörmətli direkorumuz İbrahim balamızı təbrik etmiş, ona vətənimizi, xalqımızı, məktəbimizi bu cür mötəbər yarışda uğurla təmsil etdiyinə görə öz dərin minnətdarlığını bildirmiş, uğurlarının davamlı olmasını arzulamışdır. Biz də 168 saylı tam orta məktəbin bütün pedaqoji heyət üzvləri adından İbrahimi təbrik edir, səsinin hər zaman zirvələrdən eşidilməsini arzulayırıq.
