Bakı Şəhər Təhsil İdarəsinin təşkil etdiyi nümayəndə heyəti ilə görüş
Bakı Şəhər Təhsil İdarəsi tərəfindən təşkil edilmiş komissiya heyəti bu gün rayonumuzun bütün təhsil müəssisələrində olduğu kimi məktəbimizə də təşrif gətirmişdi. 8 nəfərlik heyətdən ibarət olan komissiya üzvləri Bakı Şəhər Təhsil İdarəsi də daxil olmaqla təhsil strukturunu əhatə edən müxtəlif təşkilat və müəssisələrin nümayəndələrindən təşkil edilmişdir. Məktəbimizin akt zalında təşkil edilən görüş zamanı komissiyanın təşkili və gəlişi məqsədinə uyğun olaraq nümayəndələr öz sahələri üzrə məktəbin müəllim və valideyn kollektivinin onları maraqlandıran suallarını cavablandırmaqla yanaşı müvafiq yenilik və qərarları hər kəsin diqqətinə çatdırmışlar. Görüşün yekunundan sonra məktəbin daxili vəziyyəti, ümumi şəraiti, sinif otaqları ilə tanış olan nümayəndələr məktəbin şəraitindən, məktəbdaxili vəziyyətdən çox razı qaldıqlarını qeyd etmişlər. Bununla yanaşı, nümayəndə heyəti məktəb rəhbərliyinə məktəbimizin giriş hissəsini, dəhliz və otaqlarını bəzəyən müəllim, valideyn, şagird və texniki işçi kollektivimizin əl əməyi, göz nurundan yaranan, istedad və qabiliyyətinin bəhrəsi olan əl işlərindən ibarət sərgi, stend və dekorativ tətbiqi sənət nümunələrini bəyəndiklərini xüsusilə bildirmişlər. Qeyd edək ki, komissiya üzvlərinin verdiyi məlumata görə gələn həftədən etibaran respublikamızın bir çox rayonlarında olduğu kimi, Pirallahı rayonunda da Bakı Şəhər Təhsil İdarəsi tərəfindən səyyar qəbullar təşkil ediləcəkdir. Təhsili sahəsindəki yeniliklər, eləcə də imtahanlar, sınaq qiymətləndirməsinin ikinci mərhələsini təşkil edən direktor, direktor müavinləri, psixoloqlar, uşaq birliklərinin imtahanı haqqında məlumatlar, I sinif şagirdlərinin məktəbə qəbulu qaydaları, maaş artımının hansı faizlərlə hesablanması, bu faizlərə təsir edən amillərin nədən ibarət olması, bir sözlə desək təhsil strukturunu əhatə edən hər bir məsələ ilə bağlı sualı olan hər bir kəs bu səyyar qəbulda iştirak edib onu maraqlandıran məsələlərin cavabını öyrənə bilər. Səyyar qəbulun dəqiq yeri və zamanı haqda saytımızda məlumat veriləcəkdir.
