15 Sentyabr "Bilik Günü"dür
15 sentyabr tarixində məktəbimizdə yeni dərs ilinin başlanması münasibəti ilə "Bilik günü" təntənəli şəkildə qeyd edilmişdir.Müdriyyətin və valideynlərin iştirakı, şagird və müəllimlərin təşkili ilə ərsəyə gətirilmiş möhtəşəm tədbirdə Pirallahı rayon İcra Hakimiyyətinin məsul əməkdaşları, fəxri qonaqlar da iştirak etmişdir. Tədbiri giriş sözü ilə açan məktəbimizin direktoru Mikayılov Şakir məzunların və şagirdlərin uğurlarından, məktəbimizdə şagird sayının artmasından söz açaraq məktəbin müəllim və şagird kollektivinə öz arzu və diləklərini bildirmişdir. Xatırladaq ki, 2015/2016-cı dərs ilində məktəbimizi 63 məzun bitirmiş, onlardan 50 nəfəri ali məktəblərə qəbul imtahanlarında iştirak etmişdir. İmtahanların yekun nəticələrinə görə isə 38 nəfər məzunumuz ölkənin nüfuzlu ali təhsil müəssisələrində təhsilini davam etdirmək üçün tələbə adına layiq görülmüşdür. Onlardan 12 nəfəri 500-dən çox bal toplamışdır. Şakir müəllim daha sonra kollektiv adından tədbir iştirakçılarını əmin etdi ki, əvvəlki ənənələrinə sadiq qalaraq məktəbimiz bundan sonra da bütün qüvvəsi ilə çalışaraq cəmiyyətimiz üçün əsl vətənpərvər və savadlı kadrlar yetişdirəcəkdir.Tədbirin davamı prosesində məktəbimizin ibtidai sinif şagirdləri şeir töhfələri ilə hamını təbrik etdilər. Tədbir musiqi sədaları altında yekunlaşdıqdan sonra məktəbə yeni qədəm qoymuş birincilər, həmçinin digər şagirdlər təhsil yolunda pillə-pillə addımlamaq üzrə elm dünyalarına doğru uğurlandılar.
