Şagirdlərimiz Zirə Eko Parkında ekskursiyada oldular
Məktəbimizin III sinif şagirdləri sinif rəhbərləri Əliyeva Nigarın rəhbərliyi və təşkilatçılığı ilə məktəblilərin asudə vaxtlarının səmərəli keçirilməsi üçün yeni salınmış, yaşıllıqları ilə zövq oxşayan Zirə Eko Parkında ekskursiyada olublar. Ekskursiyanın təşkil edilməsində müəllimin əsas məqsədi dərs ilinin sonunda şagirdlərində yaranmış zehni yorğunluğu az da olsa aradan qaldırmaq, qarşıdan gələn yekun qiymətləndirmə imtahanları üçün bol enerji toplamaq, onları ekoloji cəhətdən maarifləndirmək, onlarda ekoloji şüuru formalaşdırmaq idi. 28 nəfərlik heyətdən ibarət olan fidanlarımızı Zirə Eko Parkının məsul əməkdaşı qarşılayıb, eko park haqqında şagirdlərimizə çox maraqlı məlumatlar verdi. Şagirlər Eko Parkın həyətyanı sahəsini gəzərək ordakı bitkilər, ağaclar, meyvə bağları ilə tanış olmuş, Eko Parkda saxlanan müxtəlif quş növlərinə baxmışlar. Eko Parkla ətraflı tanışlıqdan sonra burada salınmış atraksionlar, piknik guşəsində şagirdlər əyləncəli şəkildə dincəldilər. Ekskursiyanın davamı olaraq şagirdlərimiz film izləmək üçün Zirə Cinemaya dəvət olundular. Filmə baxdıqdan sonra bələdçi şagirlərimizə Xalça mərkəzi haqqında, mədəniyyət mərkəzində olan kurslar haqqında ətraflı məlumat verdi. Sonda Zirə Eko Parkının həyətyanı sahəsində ənənəvi olaraq məktəbimiz və sinfimiz adından xatirə ağacəkmə mərasimi təşkil olundu.
