Novruz- Bahar bayramınız mübarək
Elimizin, xalqımızın ən əziz bayramı olan Novruz yurdumuza qədəm qoyur. Ulularımızdan bizə yadigar qalan, milli ruhumuzu və yaddaşımızı bütün zənginliyi ilə özündə əks etdirən bu bayram münasibətilə günü-gündən gözəlləşən, müasirləşən rayonumuz olan Pirallahıda bu gün Pirallahı Rayon İcra Hakimiyyətinin təşkilatçılığı ilə ümumrayon Novruz şənliyi keçirilib. Şənlikdə rayon ümumtəhsil məktəblərinin, uşaq yaradıcılıq mərkəzinin, bağçaların Novruz adətlərini yaşatmaq, təbliğ və tərənnüm etmək uğrunda zəngin və rəngarəng estafet yarışını xatırladan, milli adət ənənələrimizi özündə əks etdirən əl işləri sərgisində məktəbimiz hər zaman olduğu kimi yüksək fəallıq göstərmiş, təhsildə olduğu kimi ictimai işlərdə də zəngin, böyük potensiala malik olduğunu bir daha sübut etmişdir. Məktəbimiz tərəfindən sərgidə təqdim olunan əsrarəngiz əl işlərində Novruz bayramının rəmzi olan bütün atributlar öz yerini almışdır. Məktəbin təlim–tərbiyə işləri üzrə direktor müavini Sevda müəllimənin zəngin fantaziyasının, qeyri-adi yaradıcı bacarığının və məktəbin texniki işçi heyətinin böyük zəhmətinin nəticəsi olan əl işləri şənlik iştirakçılarında xoş təəssürat yaradaraq hər kəsin böyük marağına səbəb olmuşdur. Novruz mətbəxinə aid şirniyyat nümunələri, bayram iştirakçılarına təqdim olunan səmənili xonçalarda boyanmış yumurta, müxtəlif şirniyyatlar, çərəzlər bayram əhvalına xüsusi dad qatmışdır. Milli paltarda şənlik iştirakçılarını və qonaqları salamlayan, onları öz mahnı, şeir sovqatı ilə feyziyab edən ibtidai sinif şagirdlərimizin çıxışları hər kəsdə xoş, pozitiv əhval ruhiyyə yaratmaqla yanaşı müəllimlərimizin gərgin əməyinin nəticəsi kimi qiymətləndirilmişdir. Xatırladaq ki, əl işləri sərgisi doğma Pirallahımızın rayon statusu almasından bəri sayca üçüncü dəfədir ki, keçirilir, məktəbimizin bu sərgidə fəallığı hər zaman böyük diqqət mərkəzində olmuş və rayon rəhbərliyi tərəfindən yüksək qiymətləndirilmişdir. Son olaraq, bir daha bütün xalqımızı 168 saylı tam orta məktəbin pedaqoji kollektivi adından Novruz bayramı münasibətilə təbrik edir, hər kəsə bol ruzi-bərəkət, möhkəm can sağlığı, uğurlar, müvəffəqiyyətlər arzulayırıq. Hər gələn ilimiz, ötən ilimizdən daha maraqlı, daha uğurlu olsun.
