Sevimli, əziz müəlliməmiz Abdullayeva Südabə - 60 yaş
“ Dahi şəxsiyyətlər yetişir az-az, hər zaman, hər yerdə inci tapılmaz”. 168 nömrəli tam orta məktəbin pedaqoji kollektivi olaraq, çox xoşbəxtik ki, kollektivimiz heç zaman yaxşı müəllim, əsl insan cəhətdən heç bir kasadlıq hiss etməmişdir. Əksinə kollektivimizdə dəyərli, qocaman, ömrünü-gününü məktəbə, təhsilə, gənc nəslin təlim tərbiyəsinə həsr etmiş müəllimlərimizlə hər zaman qürurlanmış, fəxr hissi keçirmişik. Belə savadlı, yaşı qədər təcrübəsi, öyrətmək, təhsil potensialı olan müəllimlərimizdən biri də yaxın günlərdə 60 illik yubileyini qeyd etdiyimiz A.Südabə müəllimədir. Müəllimənin 60 yaşı həyatının demək olar ki, yarıdan çoxunu keçirdiyi müəllimlər otağında, sevimli kollektivinin iştirakı ilə, həyatının ən gözəl melodiyasına çevrilmiş məktəb zənginin sədaları altında qeyd olundu. Məclisi giriş sözü ilə açan məktəbin direktoru Şakir müəllim müəllimənin kollektivin ən dəyərli üzvü olduğunu xüsusi vurğulayaraq onu bütün kollektiv adından təbrik etmiş, Azərbaycan Təhsil İşçiləri Azad Müəllimlər İttifaqının sədri Ə. Həzərxan müəllimin təbrik və arzularını çatdırmaqla ittifaqın Südabə müəllimənin 60 illik yubileyi münasibətilə verdiyi fəxri fərmanı və hədiyyəni ona təqdim etmişdir. Məktəbin pedaqoji kollektivinin üzvləri çıxış edərək müəlliməyə ən səmimi arzu və istəklərini ünvanladılar. Səbəbkar öz çıxışında 1997-ci ildən bəri üzvü olduğu kollektivlə fəxr etdiyini, 60 illiyini ikinci ailəsi olan kollektivi ilə qeyd etdiyi üçün xoşbəxt olduğunu bildirmiş, kollektivdə ona göstərilən qayğı, sevgi və diqqətə görə öz təşəkkürünü bildirmişdir. Əziz və sevimli müəlliməmizi bir daha müəllim və şagird kollektivimiz adından təbrik edir, ona uzun ömür, can sağlığı, gələcək fəaliyyətində uğurlar arzulayırıq.
