Məktəbdə 28 May – Müstəqillik Gününə həsr olunmuş təntənəli konsert keçirildi
26 may 2025-ci il tarixində məktəbimizdə 28 May – Müstəqillik Günü münasibətilə möhtəşəm konsert proqramı təşkil olundu. Tədbir musiqi dərnəyinin rəhbəri Sevinc İmanovanın təşkilatçılığı, məktəbin istedadlı şagirdləri və musiqi dərnəyinin üzvlərinin fəal iştirakı ilə ərsəyə gəldi.
Konsertdə Vətənə, azadlığa və qəhrəmanlıq ruhuna həsr olunmuş şeirlər, musiqi nömrələri və vətənpərvər mahnılar səsləndirildi. İfa olunan əsərlər Azərbaycan xalqının müstəqillik uğrunda göstərdiyi mübarizəni, qəhrəmanlarımızın şücaətini və milli qürurumuzu əks etdirirdi. Tədbir zamanı səhnədə təqdim olunan bədii kompozisiyalar və rəqs nömrələri konsertə xüsusi rəng qatdı.
Şagirdlər öz bacarıqları ilə tamaşaçıların rəğbətini qazandılar. Onların çıxışları alqışlarla qarşılandı və yüksək dəyərləndirildi. Tədbirdə məktəb rəhbərliyi, müəllimlər, valideynlər və digər qonaqlar da iştirak etdilər.
Bu cür tədbirlər şagirdlərin milli-mənəvi dəyərlərə bağlılığını gücləndirməklə yanaşı, onların yaradıcılıq bacarıqlarının inkişafına da töhfə verir. Məktəb kollektivi bundan sonra da bu tip tədbirlərin keçirilməsini davam etdirməyi planlaşdırır.
