Şəhidlər unudulmur
19.01.2016-cı il tarixdə liseydə ilk dərs saatları 20 Yanvar faciəsinin 26-cı ildönümünə həsr edilmişdir. Bütün siniflərdə şəhidlərin xatirəsi 1 dəqiqəlik sükutla yad edilmiş, onların göstərdikləri şücaət və qəhrəmanlıqlar haqqında şagirdlərə ətraflı məlumat verilmişdir. Bundan əlavə 5a sinfində Uşaq Birliyinin Rəhbəri Ətlaz Zeynalova “Şəhidlər unudulmur” adlı tədbir keçirmişdir. Tədbirdə şagirdlər bir-birindən dolğun və maraqlı çıxışlar etmişlər. Tədbirdə iştirak edən liseyin psixoloqu Dilbər Ağasiyeva o günlərin ağrı-acısından danışaraq xalqımızın başına bir daha belə faciələrin gəlməməsini dilədi. Liseyin direktoru Sevinc Orucova qanlı şənbə gecəsində dinc əhaliyə qarşı törədilən qırğınlardan danışaraq günahsız uşaqların, yaşlı insanların necə amansızlıqla qətlə yetirildiyini edildiyini statistik göstəricilərlə şagirdlərin diqqətinə çatdırdı. O, şagirdlərə tariximizi yaxşı öyrənməyi, vətənimizi sevməyi tövsiyə etdi və gələcəkdə doğma Azərbaycanı layiqincə təmsil etmək üçün onların savadlı olmalarının vacibliyini vurğuladı.
