Vətən Müharibəsi Qəhrəmanı Azad Hümbətovun büstü ziyarət olunub
27 sentyabr şəhidlərimizin anım günüdür. Liseyimizin şagirdləri Anım günündə şəhid məzunumuz, Vətən Müharibəsi Qəhrəmanı Azad Hümbətovun büstünü ziyarət ediblər. Bu gün bir xalq olaraq illərlə içimizdə yığılan qubara son qoyduğumuz gündür. Şəhidlərimiz həsrətlə qarabağlı günlərimizi xatırlayıb göz yaşlarımızı saxlaya bilmədiyimiz günlərə son qoyublar. Şəhidlərimiz qanları, canları bahasına torpaqlarımızı mənfur düşməndən qarış-qarış azad ediblər.
Qarabağın azadlığı uğrunda canından keçən şəhidlərimizdən biri də məktəbimizin məzunu və adını fəxrlə daşıdığımız igid Azad Arif oğlu Hümbətovdur. Hər il olduğu kimi məktəb olaraq biz anım günlərində, ad günlərində şəhidimizin büstünü və məzarını ziyarət edirik. Bu il də 27 sentyabrda şəhidimizi anmaq üçün liseyin biologiya müəllimi Sədaqət Əliyeva, ingilis dili müəllimi Gülnarə Cəfərova və liseyin şagirdləri şəhidin büstünü ziyarət ediblər. 9b və 7c sinif şagirdləri tər çiçəkləri şəhidin büstü üzərinə qoyub ,onun kimi vətənpərvər olacaqlarına and içiblər.
Şəhidlik elə bir zirvədir ki, hər kəsə nəsib olmaz. Amma kimliyindən asılı olmayaraq, hər kəs vətənini sevməli və onu qorumalıdır.
Allah bütün şəhidlərə rəhmət eləsin!
