Şəhidlərimizi ehtiramla anırıq
18 yanvar 2023-cü il tarixində Azad Hümbətov adına 291№-li Ekologiya liseyinin Azərbaycan dili müəllimi Ağacanova Şəlalə 8c sinif şagirdləri ilə birlikdə Şəhidlər Xiyabanını ziyarət ediblər.
Bu gün bizim üçün həm hüznlü, həm də şərəfli gündür. 33 il əvvəl yanvarın 19-dan 20-nə keçən gecə sovet ordusu dinc əhaliyə divan tutdu. Yüzdən çox oğul və qızlarımız o məşum gecədə qətlə yetirildi. Məhz o gecə tökülən qanlar hesabına ölkəmiz əsarətdən xilas oldu, yenidən dövlət müstəqilliyi əldə etdi. Şəhidlər xiyabanı ölümün gözünə dik baxan vətən övladlarının son mənzilidir. Azadlığımızın memarları, xalqı, vətəni canından çox sevən fədailər unudulmurlar. Xalqımız hər il 20 Yanvar qətliamının qurbanlarını yad edir. Şəhidlərimizin qəhrəmanlığı nəsildən-nəslə ötürülür, uşaqlar, yeniyetmələr, gənclər vətənpərvərlik ruhunda yetişirlər.
Şagirdlərimiz şəhidlərimizin məzarlarına qərənfil dəstələri qoyaraq, onları bir dəqiqəlik sükutla yad ediblər.
Allah bütün şəhidlərimizə rəhmət eləsin!
