“Möcüzəli su” (“Magic water”) respublika sosial foto-kollaj müsabiqəsi
21 dekabr 2022-ci il tarixində Ekologiya və Təbii Sərvətlər Nazirliyi və Elm və Təhsil Nazirliyi Respublika Uşaq-Gənclər İnkişaf Mərkəzi (Publik Hüquqi Şəxsi) və “EkoSfera” Sosial-Ekoloji Mərkəzi İctimai Birliyinin təşkilatçılığı ilə suyun mühafizəsini təşviq etmək üçün “Möcüzəli su” (“Magic water”) respublika sosial foto-kollaj müsabiqəsinin mükafatlandırma mərasimi və Azərbaycan Respublikasının əməkdar artisti Bəhram Bağırzadənin “Su haqqında” adlı kitabının təqdimatı keçirilib.
Məktəblilər üçün nəzərdə tutulan kitabda suyun həyati vacib rolu, dünyada su qıtlığına səbəb olan amillər, sudan qənaətlə istifadə ilə bağlı məlumatlar yer alıb.
Müsabiqənin keçirilməsində məqsəd suyun insanlara təsiri, əhəmiyyəti, sudan həddindən artıq istifadə ilə mübarizə, su resurslarının səmərəli idarə olunması, sudan dayanıqlı istifadədə rolumuz haqqında məlumatı olmayan Azərbaycanın regionlarında, xüsusilə su hövzələrinin ətrafında yaşayan uşaq və gənclər üçün maarifləndirmənin artırılmasına kömək etməkdir.
Qeyd edək ki, müsabiqə suyun mühafizəsinin keyfiyyətli şəkildə aparılması, fotoşəklin başqalarını suya qənaət etməyə inandırması, kompozisiyanın kreativliyi meyarları üzrə 6-17 yaş qrupu arasında keçirilib.
Müsabiqədə liseyin 8c sinif şagirdləri Salahov Ayaz və İbrahimova Nərgiz iştirak edib.
Sonda əməkdar artist Bəhram Bağırzadə imzalı kitablarını tədbir iştirakçılarına hədiyyə edib və xatirə fotoşəkli çəkilib.
