Liseyimizdə şəhid Sənan Kərimovun xatirəsinə şahmat turniri keçirilib
06 oktyabr 2022-ci il tarixində Vətən Müharibəsi Qəhrəmanı Azad Hümbətov adına 291 nömrəli “Ekologiya” liseyində Vətən Müharibəsi şəhidi, "Rəşadət" ordeni, “Vətən uğrunda”, “Cəbrayılın azad olunmasına görə” və "Füzulinin azad olunmasına görə" medalları ilə təltif olunmuş Sənan Kərimovun xatirəsinə həsr edilmiş şahmat üzrə Nərimanov rayon turniri keçirilib.
Müzəffər Ali Baş Komandan cənab İlham Əliyevin rəhbərliyi ilə Azərbaycanın ərazi bütövlüyü uğrunda şanlı ordumuzun qalib gəldiyi 44 günlük Vətən müharibəsində şəhidlik zirvəsinə ucalan oğullarımızdan biri də baş leytenant Sənan Kərimovdur. Onun əziz xatirəsi bu gün Nərimanov rayonunda dərin hörmətlə yad edilmişdir.
Tədbirdə çıxış edənlər Vətən uğrunda canından keçən şəhidlərimizin Vətən, torpaq naminə göstərdikləri qəhrəmanlıqların məktəblilər üçün örnək olduğunu, gələcək nəsillərin şəhidlərimizin döyüş yolunu öyrənərək vətənpərvər ruhda böyüməsində bu cür tədbirlərin böyük rolu olduğunu qeyd etmişlər.
Şəhid ailələləri hər zaman onlara göstərilən diqqət və qayğıya görə Müzəffər Ali Baş Komandan cənab İlham Əliyevə, Azərbaycan Respublikasının Birinci vitse-prezidenti Mehriban xanım Əliyevaya dərin minnətdarlıqlarını bildirmişlər.
Qeyd edək ki, turnirdə Nərimanov rayonunda fəaliyyət göstərən 17 orta ümumtəhsil məktəblərindən 34 nəfər şagird iştirak etmişdir.
Şəhidimizin valideynləri ilk gedişi edərək turniri açıq elan etmişlər.
Sonda qaliblər şəhid ailələrinin iştirakı ilə müvafiq dərəcəli diplom və medallar ilə mükafatlandırılmış, şəhidin atası Rəhman müəllimə isə turnirin xatirə diplomu və Azərbaycan Bayrağı təqdim edilmişdir.
