Liseyin Riqa məktəbi ilə əməkdaşlığı davam edir
10.11.2016-cı il tarixdə liseyin 10c sinfində Azərbaycan Latviya münasibətləri çərçivəsində liseyin Riqa məktəbi ilə əməkdaşlığının davamı olaraq Latviyanın Müstəqillik Gününə həsr olunmuş açıq dərs verilmişdir. Liseyin tarix müəllimi Ziyafət Nəcəfovanın hazırladığı açıq dərs zamanı şagirdlər qruplarla işləyərək tədqiqat işləri aparmış , Müstəqillik Gününün tarixinə böyük hörmət və məhəbbətlə yanaşmış və Latviyanın dövlət himnini səsləndirmişlər. Bu əməkdaşlıqda böyük rolu olan Milli Mədəniyyətin Təbliği İctimai Birliyinin rəhbəri Jalə Cəfərova və Latviyanın Azərbaycandakı fövqəladə və səlahiyyətli səfiri Yuris Maklakovs açıq dərsin qonağı olmuşlar. Qonaqlarla yanaşı liseyin direktoru və direktor müavinləri açıq dərsdə iştirak etmişlər. Açıq dərsin sonunda çıxış edən səfir Yuris Maklakovs liseyin rəhbərliyinə, tarix müəllimi Ziyafət Nəcəfovaya, həmçinin şagirdlərə öz minnətdarlığını bildirmiş və söyləmişdir ki, onu neçə il əvvələ - məktəb illərinə qaytarmışlar. O, şagirdlərə bildirmişdir ki, bundan sonra da əməkdaşılığı davam etdirmək niyyətindədir. Milli Mədəniyyətin Təbliği İctimai Birliyinin rəhbəri Jalə Cəfərova isə öz çıxışında qeyd etdi ki, şagirdlərin belə yüksək səviyyədə hazırlaşması ona daha maraqlı layihələr hazırlamağa sövq edir. O da öz növbəsində açıq dərsin ərsəyə gəlməsində zəhməti olan hər kəsə dərin təşəkkürünü bildirmişdir. Sonda liseyin direktoru qonaqların açıq dərsdə iştirak etdiklərindən məmnun olduğunu bildirdi.
