Basketbol yarışı keçirildi
29 aprel 2022-ci il tarixdə 212 saylı tam orta məktəbin idman zalında Nərimanov Rayon Gənclər və İdman İdarəsinin təşkilatçılığı ilə Vətən Müharibəsi şəhidi, baş leytenant Həsənağa Abdullazadənin xatirəsinə həsr edilmiş məktəblilər arasında basketbol üzrə Nərimanov rayon turniri keçirilib.
Turnirin açılış mərasimində Vətən Müharibəsi Qəhrəmanı, baş leytenant, şəhid Azad Hümbətovun valideynləri Arif Hümbətov və Leyla Hümbətova, Vətən Müharibəsi şəhidi, baş leytenant Həsənağa Abdullazadənin atası Şakir Abdullazadə, Nərimanov Rayon Gənclər və İdman İdarəsinin rəisi Nəcəf Novruzov və məktəbli basketbolçular iştirak etmişdir.
Tədbirdə çıxış edən natiqlər Həsənağa Abdullazadənin atasına Vətənimiz üçün ləyaqətli övlad böyütdüyünə görə təşəkkür edərək, Allahdan ona səbir diləmişlər. Azərbaycan Respublikasının Prezidenti, Müzəffər Ali Baş Komandan cənab İlham Əliyevin rəhbərliyi ilə 44 günlük Vətən müharibəsində qüdrətli Azərbaycan Ordusunun qazandığı tarixi Qələbədən söz açan natiqlər dövlət və xalq birliyinin yaratdığı dəmir yumruğun düşmənin başını əzdiyini və qorxulu kabusuna çevrildiyini söyləmişlər.
Liseyin idman müəllimi İlham Mahmudovun rəhbərliyi ilə liseyin komandası turnirdə iştirak edirdi.
Komandamız ilk oyunda uğursuz startdan sonra komanda özünü toparlayarag, növbəti görüşlərin hamısında qələbə qazandı. Komandamız oyunda 3-cü yerə layiq görüldü.
Mükafatlar şəhidlərin ailə üzvləri tərəfindən təqdim olundu.
Məşgci və komanda üzvləri medal və diplomlarla təltif edildilər.
