Cənnətdəki doğum günün mübarək, Şəhidim!
24 yanvar Vətən Müharibəsi Qəhrəmanı, liseyimizin məzunu, adını daşıdığı Azad Hümbətovun doğum günüdür.
Azad Hümbətov liseyimizi 2013-cü ildə bitirmişdir. Heydər Əliyev adına Azərbaycan Ali Hərbi Məktəbinin tank bölüyü ixtisasına daxil olmuş, 2017-ci ildə həmin məktəbi leytenant hərbi rütbəsi ilə bitirmişdir. Təyinatı üzrə elə həmin ildə Füzuli rayonunun Horadiz şəhərindəki hərbi hissədə öz vəzifəsinə başlamışdır.
2018-ci il "Azərbaycan ordusunun 100 illiyi" münasibətilə keçirilən hərbi paradda bayraqdar vəzifəsini daşımış və "Silahlı Qüvvələrin 100 illiyi" medalı ilə təltif olunmuşdur.
Vətən Müharibəsində Azad on minlərlə vətən oğlumuz kimi qəhrəmanlıq göstərmişdir. 27 oktyabr 2020-ci ildə Laçın rayonu uğrunda gedən döyüşlərdə rəşadətlə döyüşmüş və şəhid olmuşdur.
II Fəxri Xiyabanda dəfn olunmuşdur.
9 dekabr 2020-ci ildə Hümbətov Azad Arif oğluna (ölümündən sonra) "Vətən müharibəsi qəhrəmanı" adı verilmişdir.
Azad "Vətən uğrunda", "Füzulinin azad olunmasına görə", "Xocavəndin azad olunmasına görə" medalları ilə təltif edilmişdir.
Cənnətdəki doğum günün mübarək, Şəhidim!
