Milli Qəhrəman Mübariz İbrahimov
7 fevral 2022 – ci il tarixində Azərbaycanın Milli Qəhrəmanı Mübariz İbrahimovun anadan olmasının
34 – cü il dönümü ərəfəsində Suraxanı rayonu şəhid D.Məmmədzadə adına 232 № - li məktəbin 10a sinif şagirdləri, məktəbin direktoru Fərəcova Nisə və sinif rəhbəri Əkbərova Aynurun müşayiəti ilə II Fəxri xiyabanda Milli Qəhrəmanın qəbrini ziyarət etdilər. Şagirdlər qəhrəmanın məzarı üstünə gül dəstələri qoydular.
Mərasimdə məktəbin direktoru Fərəcova Nisə çıxış edərək Azərbaycanın tarixən öz qəhrəmanları ilə seçildiyini, doğum günü qeyd edilən Mübariz İbrahimovun da qanında-canında qəhrəmanlıq və mübarizlik ruhunun yüksək olduğunu vurğulayıb Öz şücaəti ilə ömrünün gənclik çağında tarixə və gənc nəslin qəlbinə adını yazmış qəhrəmanın ölməzlik qazandığı, ölçüyəgəlməz Vətən sevgisinin onu şəhidlik zirvəsinə ucaltdığını diqqətə çatdırıb. Mübarizin göstərdiyi şücaətin ölkə Prezidenti, Ali Baş Komandan İlham Əliyev tərəfindən yüksək qiymətləndirdiyi , ölkəmizin müstəqilliyinin və ərazi bütövlüyünün qorunub saxlanılmasında xidmətlərinə görə Milli Qəhrəman adına layiq görüldüyünü və şəhidin nəşinin çətinliklə də olsa alındığını qeyd edib. Nisə xanımın vətənpərvərlik mövzusunda səsləndirdiyi şeir şagirdlərin təsirlənməsinə səbəb olub.
Tədbirdə sinif rəhbəri Aynur müəllimə , şagirdlərdən Zalov Toğrul və Poladlı Zəhra Azərbaycanın qəhrəman oğlu Mübariz İbrahimovun igidliyindən danışdılar onun həyat yolundan , göstərdiyi şücaət və qəhrəmanlıqdan bəhs etdilər.
Sonra Vətənimizin azadlığı uğrunda I Qarabağ müharibəsində və 44 günlük müharibədə canlarını qurban vermiş şəhidlərin xatirələri də yad edilib, məzarları üzərinə tər güllər düzülüb.
