232 №-li tam orta məktəb

Şagirdlərin asudə vaxtının və yay tətilinin səmərəli təşkili baxımından əhəmiyyətli tədbirlər keçirilir
  "Məktəbin informatika müəllimi Pəri Əhmədova və kitabxana müdiri Aytən Məmmədova "Ruhlara sərinlik gətirən mütaliə" layihəsinə start verdi.Bir həftə davam edən marafonda əvvəlcə bir neçə bədii kitab təklif edildi.Şagirdlərin daha çox marağını cəlb etdiyi üçün Norveç yazıçısı Klaus Haqerüpün qələmə aldığı "Kitabları xilas etmək istəyən qız" kitabının mütaliəsinə və daha sonra  müzakirəsinə qərar verildi.Onlayn şəkildə keçirilən görüşdə şagirdlər kitabın mövzusunu, məzmununu, ideyasını, əsərdəki obrazlara münasibətlərini ifadə etdilər.
  24 iyul tarixində məktəbin oxu zalında keçirilən yekun bədii diskusiyanı giriş sözləri ilə açan Pəri müəllim kitabların insan həyatında rolu, onların  şagirdlərin nitq ehtiyatının formalaşmasına və dünyagörüşünün artırılmasına təsirindən danışdı.Daha sonra Aytən Məmmədova əvvəlcədən tərtib olunmuş suallar əsasında əsərin bədii təhlilini təqdim etdi.Ədəbiyyat müəllimi Kəminə Zalova  şagirdlərə mütaliə vərdişlərinin formalaşdırılması barədə öz peşəkar tövsiyələrini səsləndirdi. Şagirdlərin fəal müzakirəsindən sonra məktəbin direktoru Günel Fətəliyeva və təşkilatçı müavin İsrafil Hüseynov layihə haqda düşüncələrini dilə gətirib mütaliənin şagirdlər üçün faydalarını bir daha vurğuladılar.Növbəti mərhələdə məktəbin İKT vasitələrindən istifadə edərək əsər barədə "Kahoot" platformasında yarış keçirildi.Fəallığı ilə seçilən 6"B" sinif şagirdi Nilay Hüseynzadə mükafatlandırıldı.

Yay tətili şagirdlərin məktəbdən ayrı qaldıqları ən uzun zaman kəsiyidir. Əlbəttə, həm müəllimlərin, həm də şagirdlərin dincəlməyə ehtiyacı var. Lakin unutmamalıyıq ki, yay tətilində şagirdlərin təhsildən uzaqlaşması akademik biliklərin itgisi və öncəki tədris ili müddətində öyrəndiklərinin qismən unudulması ilə nəticələnir.
   Məktəbimizin  şagirdlərin yaş xüsusiyyətlərinə uyğun hazırlanmış "yay fəaliyyət planına" əsasən müəllimlərimiz tez-tez maraqlı dərslər təşkil edir, mənimsənilmiş bilik və bacarıqların unudulmasının qarşısını alır.
  İnformatika müəllimi Pəri Əhmədova da 20 iyul tarixində   3-cü və 4-cü sinif şagirdləri ilə "İnformasiya anlayışı" mövzusunda onlayn ümumiləşdirici dərs təşkil etdi.
  Məqsəd şagirdlərin ilkin anlayışlarla bağlı biliklərini təkrar etməsinə dəstək olmaq, həmçinin onları İKT vasitələrindən səmərəli istifadəyə səsləmək idi.

2023-2024 - cü tədris ilinin buraxılış imtahanlarının nəticələri  və yekun qiymətlər əsasında məktəbimizin 9-cu və 11 - ci siniflərini müvəffəqiyyətlə başa vuran yeddi şagirdə fərqlənmə attestatları təqdim olundu. Məktəbin direktoru Günel Fətəliyeva 11 “A” sinif şagirdləri Mustafa Abbasov, Əli Bədəlov, Zeynəb Heydərli, Jalə Həsənli, İsa Kərimov, Səbinə Quliyeva və 9 “B” sinif şagirdi Əli Kərimlini təbrik etdi və fərqlənmə attestatları şagirdlərə təqdim olundu.

    11 “A” sinfinin  rəhbəri Kəminə Zalova də eyni zamanda fərqlənmə attestatı əldə edən şagirdlərin buraxılış və qəbul  imtahanında 630-670 aralığında bal toplamalarını sevindirici hal kimi qeyd etdi və təbriklərə qoşuldu.

Məktəbimizin şagirdlərinə tam orta təhsil haqqında attestatlar təqdim olundu. Şagirdlərlə birlikdə onların valideynləri və sinif rəhbərləri iştirak etdilər. Məktəbin direktoru Günel Fətəliyeva məzunlarımızı təbrik edərək attestatları onlara təqdim etdi. Sonda məzularımız direktorla xatirə şəkili çəkdirdilər.

Bakı Şəhəri üzrə Təhsil İdarəsi (BŞTİ) tərəfindən paytaxtın təhsil müəssisələrinin iştirakı ilə “Məktəblinin yay mütaliəsi” adlı layihəsinə start verilir.

Layihənin əsas məqsədi şagirdlərin yay tətili günlərində asudə vaxtlarının səmərəli təşkili, mütaliəyə maraqlarının artırılması, kitab mübadiləsi mədəniyyətinin genişləndirilməsi, oxu bacarıqlarının inkişaf etdirilməsi və nitq vərdişlərinin təkmilləşdirilməsindən ibarətdir.

Layihə çərçivəsində paytaxtın təhsil müəssisələri şagirdlərin oxuduğu kitabları əks etdirən fotoşəkilləri, yaxud oxuduqları əsər və onun müəllifi ilə bağlı fikirlərinə dair videogörüntüləri məktəbin sosial şəbəkə hesablarında #məktəblininyaymütaliəsi haşteqi ilə paylaşması nəzərdə tutulur.

Qeyd edək ki, layihə sentyabr ayına qədər davam edəcək.