Gənclər Gününə həsr olunmuş Breyn-rinq keçirildi
Məktəbimizdə Gənclər Gününə həsr olunmuş Breyn-rinq keçirildi. Breyn-rinqdə məktəbin gənc müəllimləri və X, XI sinif şagirdləri iştirak edirdilər. Yarışın açılışını edən aparıcılar: məktəbin Azərbaycan dili və ədəbiyyat müəllimi Novruzlu Rahilə və 10 «A” sinif şagirdi Zalov Toğrul ümummilli lider Heydər Əliyevin gənclərin gələcəyi üçün atdığı addımlardan, bu istiqamətdə həyata keçirdiyi tədbirlərdən məlumat verdilər. Qeyd olundu ki, gənclərimizin son illər cəmiyyətin müxtəlif sahələrində, o cümlədən hərb sahəsində uğurlar qazanırlar.
Daha sonra breyn-rinqin gedişi və şərtləri haqqında məlumat verildi. Yarış hər turda 3 sual olmaqla 3 raund üzrə təşkil olunmuşdu. I raundda Azərbaycan tarixi və mədəniyyəti ilə ,II raundda ümumi dünyagörüşü ilə bağlı suallar var idi. III raund da məntiqi, əyləncəli suallardan ibarət idi. Burada həmçinin 44 günlük şanlı tarixə aid suallar yer alırdı. Breyn-rinqdə adı “Zəfər”, “Uğur”, “Qələbə” olan 3 komanda yarışırdı. Komandaların tərkibində 2 müəllim, 4 şagird iştirak edirdi. Yarışın gedişini və nəticələri münsiflər heyəti izləyirdi. Münsiflər heyətinin tərkibində məktəbin direktoru Nisə Fərəcova, direktor müavinləri Günel İsmayılova, Səfa Orucəliyev, Uşaq Birliyi Rəhbəri Mədinə İsgəndərova iştirak edirdilər.
Sonda münsiflər heyəti nəticələri elan etdi. Breyn-rinqin qalibi 150 balla “Qələbə” komandası oldu. Komandalar fəxri fərmanla təltif olundular.
Sonda direktor Nisə Fərəcova çıxış edərək gənclərə öz tövsiyə və məsləhətlərini verdi, onlara gələcək həyatında uğurlar arzuladı. Gənc müəllimlər məktəb rəhbərliyi tərəfindən təşəkkürnamə ilə təltif olundular.
