15 sentyabr "Bilik günü"
Respublikamızın bütün təhsil müəssisələrində olduğu kimi Bakı şəhəri 211№li orta məktəbində də " Bilik günü " böyük təntənə ilə qeyd edildi. Tədbiri giriş sözü ilə məktəbin direktoru Vaqif Babayev açdı. V. Babayev məktəbin keçən tədris ilindəki uğurlarından danışaraq şagirdləri xüsusilə, ilk dəfə məktəbə qədəm qoyan 205 nəfər birinci sinif şagirdlərini tədris ili münasibətilə təbrik edərək onlara uğurlar arzuladı. Qeyd edək ki, 2014/2015-ci tədris ilində məktəbi bitirən 82 məzundan 75-i qəbul üçün sənəd vermiş, 42-si Respublikamızın müxtəlif ali məktəblərinə qəbul olub tələbə adını qazanmış, 3 nəfər isə xarici ölkələrdə təhsil almağa nail olmuşdur. Məzunlarımızın 5 nəfəri 500-dən, 3 nəfəri 600-dən, 2 nəfəri isə 650-dən yuvarı bal toplayaraq yüksək nəticə göstərmişdir. Yüksək nəticə göstərən şagirdlər məktəb rəhbərliyi tərəfindən mükafatlandırılmışdır. Tədbirdə məktəbi qızıl medalla bitirən Orxan Əlizadə çıxış edərək yeni tədris ili münasibətilə müəllimlərini təbrik etmişdir. Tədbirdə müəllimlərin, valideynlərin, birincilərin çıxışlarından sonra ilk zəngin sədaları altında şagirdlər dərsə başlamış, ilk dərslər bütün siniflərdə "Bakı-2015" Avropa Oyunlarına həsr olunmuşdur.
