”Yol nişanlarına diqqət edək!” adlı maarifləndirici təlim
Dekabrın 1-də Pirallahı Rayon İcra Hakimiyyəti və Pirallahı Rayon Dövlət Yol Polisi Şöbəsinin birgə təşkilatçılığı ilə ”Yol nişanlarına diqqət edək!” adlı maarifləndirici təlim təşkil edilib.
Təlimdə Pirallahı Rayon İcra Hakimiyyəti başçısı Aparatı və Pirallahı Rayon Dövlət Yol Polisi Şöbəsinin məsul əməkdaşları, rayon ərazisində fəaliyyət göstərən ümumi təhsil məktəblərinin müəllim və şagirdləri iştirak edib.
Məktəblilər arasında yol hərəkəti qaydalarını təbliğ etmək və yol nişanlarının mənasını öyrətmək məqsədilə keçirilən təlimdə şagirdlərə yol nişanları haqqında məlumat verilib, yol hərəkəti qaydalarına diqqət etməyin əhəmiyyəti vurğulanıb. Bildirilib ki, uşaq və yeniyetmələr arasında yol hərəkəti təhlükəsizliyinə dair bilik və vərdişlərin inkişaf etdirilməsi, yol hərəkəti qaydaları haqqında məlumatlılığın artırılması, ətraf mühitin nəqliyyatın zərərli təsirlərindən qorunması, eləcə də uşaq travmatizminin qarşısının alınmasında ictimai həmrəyliyin təmin olunması əsas şərtlərdən olduğu vurğulanıb.
Təlim uşaqlar tərəfindən böyük maraq və coşqu ilə qarşılanıb.
Sonda Pirallahı Rayon Dövlət Yol Polisi Şöbəsinin əməkdaşları tərəfindən şagirdləri maraqlandıran yol hərəkəti qaydaları və nişanları haqqında suallar cavablandırılıb, xatirə şəkli çəkilib.
