Cavid Nurməmmədovun anım günü keçirildi
11 dekabr məktəbimizin adını daşıdığı şəhid məzunumuz Cavid Nadir oğlu Nurməmmədovun anım günü keçirildi. Məktəb kollektivi hər il olduğu kimi bu ildə onun xatirəsini yad etmək üçün tədbir hazırladı. II “C” və VII “C” sinif şagirdlərinin hazırladıqları tədbirdə Cavid Nurməmmədovun həyatı haqqında məlumat verildi. Onun həlak olduğu təyyarə qəzası barədə danışıldı. Tədbirdə məktəb rəhbərliyi, “Oriqami” Uşaq və Gənclərin İctimai Birliyinin rəhbəri Namiq Həsənov, şəhidin qardaşı oğlu Əlövsət Nurməmmədov və II “C” sinfinin valideyni da iştirak edirdi. Məktəbin təlim tərbiyə işləri üzrə direktor müavini Qasımova Umxanım çıxış edərək bildirdi ki, biz fəxr edirik ki, bizim Cavid və Nizami Nurməmmədovlar kimi igid ,qorxmaz, yardımsevər oğullarımız-məzunlarımız olub. Gün gələcək indiki gənclərimiz vətənpərvər oğullarımız Vətən torpağını düşmən tapdağından xilas edəcək, analarımızın bacılarımızın göz yaşları silinəcək. “Oriqami” Uşaq və Gənclərin İctimai Birliyinin rəhbəri Namiq Həsənov da çıxış edərək tədbirin hazırlanmağında əməyi keçən hər kəsə minnətdarlığını bildirdi. Həmçinin məktəbdə Cavid və Nizami Nurməmmədovların xatirəsinə keçirilmiş inşa yazı müsabiqəsində iştirak edən hər kəsi sertifikatlarla təltif etdi. Çıxışında qeyd etdi ki, mənə çox xoş oldu ki, bu məktəbdə bu cür belə vətənpərvər ruhlu şagirdlər təhsil alır.Şəhidin qohumu da çıxış edərək bildirdi ki,bu bir ailənin faciəsidir, bir evdən iki oğul şəhid olub. Biz övladlarımızı vətənpərvər ruhda böyütməliyik ki,Vətənimizin dar günündə Vətənə arxa dayaq olsun, onu mənfur düşməndən qorusun.
