108 №-li tam orta məktəb

    2025-ci tədris ilinin II yarımilinə aid Böyük Summativ Qiymətləndirmə mərhələsi uğurla yekunlaşdı. Qiymətləndirmə prosesində şagirdlərin tədris ili ərzində qazandıqları bilik və bacarıqlar obyektiv şəkildə yoxlanıldı. Müəllim heyətinin və məktəb rəhbərliyinin nəzarəti altında həyata keçirilən bu mərhələ, şagirdlərin il sonu nailiyyətlərinin qiymətləndirilməsində mühüm rol oynadı.

    9-cu və 11-ci sinif imtahanlarında yüksək nəticə göstərən şagirdlər məktəb rəhbərliyi tərəfindən tərifnamə ilə mükafatlandırıldılar. Onların əzmi, məsuliyyəti və hazırlıq prosesi bu uğura aparan əsas amillərdən oldu. Bu nəticə digər şagirdlər üçün də motivasiya mənbəyi kimi qiymətləndirildi.

    ETN və BŞTİ-nin 01.04.2025-ci il tarixli əmrinə əsasən "Dəyərlərimizi qoruyaq" layihəsi çərçivəsində müəllim Rəcəbova Könül tərəfindən VII sinif şagirdlərindən ibarət dörd komanda ( Kinoşünaslar, Operatorlar, Rejissorlar və Rəssamlar komandaları) arasında “Kinoman” yarışı keçirildi. Yarışda məktəbin direktoru Məmmədzadə Nəriman, təlim-tərbiyə işləri üzrə direktor müavini Zəhra Əkbərova, məktəbdənkənar və sinifdənxaric tərbiyə işləri üzrə təşkilatçı İlahə Quliyeva, məktəbin kitabxana müdüri Həsənova Natavan, uşaq birliyi rəhbəri Aygün Pənahova iştirak etdi. Yarışı giriş sözü ilə Könül müəllim açdı. O, qeyd etdi ki, bu yarışın keçirilməsində əsas məqsəd milli-mənəvi dəyərlərinin qorunması və qayğısına qalınması, şagirdlərdə milli ruhun güclənməsi və dövlətçilik ideologiyası, milli ideologiyanın  inkişaf etdirilməsidir. Azərbaycan filmlərinin, xüsusən də uşaqlar, gənclər və yeniyetmələr üçün vaxtilə istehsal edilən filmlərin bu gün təbliğ edilməsi zəruridir. Çünki o dövrdə çəkilən filmlərdə uşaqlarda humanizm, yaxşılıq etmək istəyi, mənəvi dəyərlərə hörmət hissi daha qabarıq şəkildə ifadə olunub. Bundan başqa, insanda uşaqlıqdan formalaşmalı olan cəsurluq, qorxmazlıq, düzlük kimi keyfiyyətlər inkişaf etdirilməlidi. Yarışda komandalar Azərbaycan kinosunun tarixi, məşhur aktyor və rejissorlar haqqında sualları cavablandırdılar, Azərbaycan tarixi  və uşaq filmlərindən kadrlara baxaraq kadrın hansı filmdən olduğunu tapdılar. VIIc sinif şagirdi Nuray kamançada filmlərdən musiqi ifa etdi. Münsifllər heyətinin qərarı ilə VIIb sinfinin “Operatorlar” komandası yarışda qalıb oldu.Sonda  komandalar sertifikatla mükafatlandırıldı və xatirə şəkil çəkildi.

    Azərbaycan Respublikasının Prezidenti cənab İlham Əliyevin müvafiq Sərəncamına əsasən, tanınmış Azərbaycan dəzgah boyakarlığının banisi Mirzə Qədim İrəvaninin 200 illiyi münasibətilə ölkə miqyasında silsilə tədbirlər həyata keçirilir. Sözügedən Sərəncam çərçivəsində Milli Azərbaycan Tarixi Muzeyində “Mirzə Qədim İrəvani dövrü, mühiti və yaradıcılığı ” mövzusunda  tədbir keçirilib.
Tədbirdə çıxış edən muzeyin Təsviri materiallar fondunun müdiri, m.ü.f.d., dosent Nardanə Yusifova qeyd edib ki, Mirzə Qədim İrəvaninin Azərbaycan rəngkarlığının təşəkkülündəki əhəmiyyətli rolunu gələcək nəsillərə çatdırmaq olduqca vacib məsələdir.
Sonra muzeyin elmi işlər üzrə direktor müavini, t.e.d., dosent Fərhad Cabbarov, Qərbi Azərbaycan mövzusunun aktual olduğunu bildirərək belə tədbirlərin mühüm əhəmiyyət daşıdığını qeyd edib.
Digər çıxışçılar Mirzə Qədim İrəvani haqqında maraqlı faktları  diqqətə çatdırıblar.
Tədbirin sonunda Mirzə Qədim İrəvaninin əsərləri əsasında Bakı İncəsənət gimnaziyasının və 108 saylı orta məktəb şagirdlərinin əsərləri də nümayiş olunub.
Məktəbimizin istedadlı şagirdləri - D.Səbinə (XI b), Ə.Mədinə (Xa), K.Zəhra (lXç), A.Mədinə (lXc) Mirzə Qədim İrəvanənin yaradıcılığına aid kompozisiyalar təsvir etmişlər. Şagirdlərimiz və təsviri incəsənət müəllimimiz Pənahova Aybəniz Təşəkkürnamə ilə təltif ediliblər.

    Bu gün-1 iyun-gələcəyin memarları olan balaca ürəkləri daha çox sevmək, onları qorumaq və səsinə qulaq vermək günüdür. Uşaqlar yalnız sevgi ilə böyüyəndə içlərindəki işıq sönmür, yalnız diqqət və qayğı ilə parlayır, ucalır və dünyanı dəyişəcək gücə çevrilirlər.  1 İyun – Uşaqların Beynəlxalq Müdafiəsi Günü münasibətilə məktəbimizdə möhtəşəm tədbir keçirildi. Tədbirdə uşaqların sevinci, gülüşü, istedadı və bacarıqları ön planda oldu. Məktəbimizdə təşkil olunan tədbir rəngarəng və yaddaqalan anlarla yadda qaldı. Sizi qorumaq, sizə inanmaq, sizin üçün daha gözəl sabahlar yaratmaq bizim ən böyük məsuliyyətimizdir.