Beynəlxalq rəssamlar günü qeyd edildi
Məktəbdə "8 dekabr Beynəlxalq Rəssamlar Günü" təntənəli şəkildə qeyd edildi. Belə ki, bu gün münasibətilə 8 dekabr məktəbdə "Təsviri incəsənət günlüyü" keçirildi. Təsviri incəsənət müəllimi Pənahova Aybənizin təşəbbüsü ilə təşkil olunan bayram rəngarəngliyi ilə yadda qaldı. Gün ərzində şagirdlərin rəssamlıq bacarıqlarını sərgiləmək üçün bütün şərait yaradılmışdır. Dəhlizlərdə qoyulan molbertlərdə istedadlı şagirdlər müxtəlif texnikalarla sərbəst işləyərək gözəl rəsmlər yaratdılar. Onları maraqla izləyən məktəbin müəllim və şagird kollektivi şagirdlərin yaradıcı qabiliyyətlərini yüksək dəyərləndirdilər. IX sinif şagirdləri Əliyeva Nuranə, Salamova Tərbiyə, Hacıyeva Ləman, VII sinif şagirdi Quluzadə Fatimə, VI sinif şagirdi Əliyeva Lalə tədbirdə fəallıq nümayiş etdirərək gələcəkdə rəssam olmaq arzusunda olduqlarını söylədilər.
Tədbirə rəng qatan digər amil isə məktəb şagirdləri üçün təşkil edilən "face art" hissəsi oldu. P. Aybəniz müəllim şagirdlərin üzlərində maraqlı, rəngarəng rəsmlər təsvir edərək onları sevindirdi və bu günün "balaca rəssamlarını" təbrik etdi.
Şagirdlərin əl işləri və plakatlardan ibarət geniş sərgi isə öz növbəsində bayram ab-havasını daha da artırdı. Xüsusi istedadlı şagirdlərin müxtəlif mövzu və janrda yaratdığı tablolar onların rəssamlıq sahəsində kifayət qədər uğurlu olmasının bariz nümunəsi idi.
Şagirdlərə yaradıcılıq uğurları arzulayırıq!
