Şagirdlərə "Yaşıl kartlar" verilib
“Ümumi təhsil müəssisələrində şagird davranış qaydaları” adlı pilot layihənin tətbiq olunduğu məktəblərdən biri də 71 N-li tam orta məktəbdir. Bu layihə təhsilalanların aşağıdakı hüquq və vəzifələrini təmin etmək məqsədi ilə ümumi təhsil müəssisələrində nizam-intizamı tənzimləyən qayda və prosedurları əhatə edir:
1. Fiziki təhlükəsizlik
2. Psixoloji sağlamlıq
3. Məktəbdaxili münasibətlər
4. Əlverişli öyrənmə mühiti
5. Azərbaycanın milli-mənəvi dəyərlərini əks etdirən müvafiq məktəb mühiti
Layihə şagird davranış qaydalarını, davranış səviyyələrini, korreksiyaedici və rəğbətləndirmə tədbirlərini birləşdirir. Layihə çərçivəsində hər yarımilin sonunda məktəbdə müəyyən edilmiş 3 meyar əsasında yarımil boyu heç bir qayda pozuntusuna yol verməyən və eyni zamanda öz akademik uğurları, nümunəvi davranışı, məktəb mühitində sosial fəaliyyəti ilə fərqlənən şagirdlər arasında dəyərləndirmə aparılır və müvafiq meyarlara cavab verən şagirdlər “Yaşıl kart” (Rəğbətləndirmə kartı) ilə təltif olunur.
2024-2025-ci tədris ilinin birinci yarımilinin yekunlaşmasını nəzərə alaraq 27.12.2024-cü il tarixində məktəbin ibtidai sinif şagirdlərinə Nizam İntizam Şurasının üzvləri və məktəb rəhbərliyi tərəfindən “Yaşıl kart”( Rəğbətləndirmə kartı) təqdim olunub.
