Qazaxıstanlı qonaqlarla seminarlar və kimya gecəsi
Səfərlərinin ikinci günü qonaqlarımız məktəbimizin pedaqoji heyəti ilə bilik və təcrübə mübadiləsi əsasında seminarlar keçirdi. Nazarbayev adına İntellektual Məktəbin müəllimləri interaktiv sessiyada müasir yanaşma, innovativ tədris metodları və tətbiq etdikləri üsullar barədə ətraflı məlumat verdilər. Seminar zamanı fəal müzakirələr aparıldı, qarşılıqlı fikir mübadiləsi baş tutdu. Günün ikinci yarısı isə məktəbimizdə əyləncəli və maarifləndirici “Kimya gecəsi” ilə yadda qaldı. Tədbir zamanı müəllim və şagirdlər birlikdə maraqlı kimyəvi reaksiyalar apardılar. Partlayış effekti verən maddələr, rəng dəyişiklikləri, tüstü ilə müşayiət olunan təcrübələr zalda əyləncəli anlar yaşatdı. Bu səhnələr yalnız elmi maraq oyatmaqla qalmadı, həm də müəllim-şagird birliyini nümayiş etdirdi. Kimya gecəsinin xüsusi diqqət çəkən hissəsi isə şagirdlərin hazırladığı səhnəciklər oldu. Onlar Dmitri Mendeleyev, İordan Azərbayev və Yusif Məmmədəliyevin obrazlarını canlandıraraq kimya elminin inkişafına verdikləri töhfələri əyani şəkildə təqdim etdilər. Alimlərin həyat və fəaliyyəti aktyorluq bacarıqları ilə vəhdət təşkil edərək, tamaşaçılara həm gülüş, həm də düşüncə bəxş etdi.
Tədbir məktəb kollektivi və qonaqlar üçün unudulmaz anlarla yadda qaldı. Bu gecə elmi biliklərlə yanaşı, yaradıcılıq və əməkdaşlıq ruhunu da ön plana çıxardı.
