Qazaxıstandan gələn qonaqlarla məktəbimizdə intelektual günlər

Ötən həftənin sonunda məktəbimizdə əlamətdar və coşqulu anlar yaşandı. Əməkdaşlıq etdiyimiz Qazaxıstan Respublikasının Aktau şəhərində yerləşən Nazarbayev adına İntellektual Məktəbin 11 nəfərlik nümayəndə heyəti məktəbimizin qonağı oldu. Səfərlərinin ilk günü qonaqlar məktəbimizdə keçirilən təqdimat dərslərində iştirak etdilər. Ardınca hər iki xalqın ortaq mədəniyyəti, tarixi, adət-ənənələri haqqında maraqlı məlumatların bölüşüldüyü "Breyn Rinq" adlı intellektual yarış təşkil olundu. Yarışda hər iki məktəbin müəllim və şagirdlərindən ibarət qarışıq komandalar iştirak etdi. Bu format iştirakçılar arasında dostluq və əməkdaşlıq ruhunu daha da gücləndirdi. Yarışın sonunda qalib komanda mükafatlandırıldı, iştirakçılara isə xatirə hədiyyələri təqdim olundu. Bu görüş hər iki məktəbin kollektivi üçün yaddaqalan və faydalı bir təcrübə oldu.