36 №-li tam orta məktəb

     Məktəbimizin şagirdi Aida Piriyeva dünyanın müxtəlif ölkələrindən olan gənc tədqiqatçıların qatıldığı, Sankt-Peterburq Dövlət Texnologiya İnstitutu tərəfindən təşkil edilən nüfuzlu “Chemical Analysis of Materials Used in Ebru” (“Kimya və İncəsənət”) adlı beynəlxalq elmi-tədqiqat layihəsində iştirak edərək üçüncü yerə layiq görüldü. Bu layihə kimya və incəsənətin qovuşduğu unikal bir platformadır və Qazaxıstan, Özbəkistan, Türkiyə, Rusiya və digər ölkələrin aparıcı məktəblərindən seçilmiş istedadlı şagirdləri bir araya gətirib. Layihə çərçivəsində iştirakçılar müxtəlif elmi yanaşmalar tətbiq edərək incəsənətin kimyəvi əsaslarını araşdırıblar. Ebru—su üzərində rənglərin ahəngi ilə yaradılan qədim bir incəsənət növüdür. Lakin bu sənət yalnız estetik deyil, eyni zamanda ciddi kimyəvi proseslərə əsaslanır. Layihə çərçivəsində məktəbimizin kimya müəllimi Gülçöhrə Rzayeva və rəsm müəllimi Firuzə Əlibabayeva şagirdimiz Aida Piriyeva ilə birgə bu sənətin kimyəvi aspektlərini təhlil ediblər. Laboratoriya təcrübələrində ebru sənətində əsas komponentlərdən biri olan öd maddəsinin suyun səth gərginliyinə təsiri araşdırılıb. Məhz öd sayəsində boyalar suyun üzərində sərbəst yayılaraq incə naxışlar yaradır. Eyni zamanda Firuzə Əlibabayeva Aida Piriyevaya ebru sənətinin praktiki üsullarını öyrədib, bu sənətin incəliklərini tətbiq etməkdə ona dəstək olub. Bu sənətin kökləri dərinlərə gedib çıxır—böyük mütəfəkkirimiz Nizami Gəncəvi suyun hərəkətindən və onun üzərində yaranan naxışların sənətə çevrilə biləcəyindən öz əsərlərində bəhs etmişdir. Aida Piriyeva layihəyə video təqdimat formatında qatılaraq həm sənət nümunələrini, həm də apardığı tədqiqatların nəticələrini münsiflər heyətinə təqdim edib. Onun elmi yanaşması və yaradıcı tətbiqi yüksək qiymətləndirilib və nəticədə məktəbimiz beynəlxalq miqyasda böyük bir nailiyyət əldə edib. Bu uğur ebru sənətinin elmlə necə qovuşduğunu, kimyanın incəsənətə necə yeni perspektivlər qazandırdığını bir daha sübut edir. Keçmişin ənənələrini müasir elmi biliklərlə birləşdirərək, biz yeniliklərə imza atmağa davam edirik.