Şərəfli müəllim ömrü
11 noyabr 2019-cu il tarixində 287 nömrəli Zəkalar liseyinin qurucusu, "Əməkdar müəllim" Rafil İmanovun 70 illik yubileyi qeyd edildi. Tədbirdə liseyin kollektivi və ailə üzvlərindən başqa Rafil İmanovun müəllim kimi çalışdığı ilk illərdən dərs dediyi şagirdləri, pedaqoji fəaliyyəti boyunca onunla çiyin-çiyinə çalışmış müəllim və dəyərli riyaziyyatçı alim yoldaşları, yaxın dostları iştirak edirdilər. Tədbirin təşkilatçısı liseyin təşkilati işlər üzrə direktor müavini Səidə Rəhimova, ssenari müəllifləri liseyin Azərbaycan dili və ədəbiyyat müəllimləri Tərlan Həsənova, Sahilə Bilalova idi. Tədbiri liseyin direktoru, Rafil İmanovun şagirdlərindən biri Aygün Əhmədli giriş sözü ilə açıq elan etdi. Tədbirin bədii hissəsindən sonra yubilyarın həyat yoluna həsr olunmuş "Müəllim ömrü" adlı film nümayiş etdirildi. Daha sonra çıxış edənlər yubilyarın dəyərli ömür yolundan bəhs etdilər. Tədbirdən sonra bir qrup tədbir iştirakçısı Rafil İmanovun qəbrini ziyarət etdi.