Baba Vəziroğlu və Faiq Sücəddinov ilə məktəblilərin görüşü
27 fevral 2024-cü il tarixində məktəbimizin direktoru Qənirə Əmircanovanın təşəbbüsü ilə Əməkdar incəsənət xadimi, şair, nasir, publisist, kinodramaturq, tərcüməçi,Azərbaycan Yazıçılar Birliyinin üzvü,1988-ci ildə “Respublika komsomolu” mükafatı, 2000-ci ildə isə “Humay” mükafatı laureatı Baba Vəziroğlu ilə görüş keçirilmişdir.Baba Vəziroğlu bu görüşə Azərbaycanın xalq artisti, tanınmış bəstəkar Faiq Sücədddinov ilə birlikdə qatılmışdır.
Görüşü giriş sözü ilə məktəbin direktoru Qənirə Əmircanova açmış, şairin məktəblilərlə görüşünün şagirdlər üçün böyük önəm daşıdığını qeyd etmişdir. Direktor bu tipli tədbirlərin uşaqların tərbiyəsinə, dünyagörüşünə, söz ehtiyatlarının zənginləşməsinə, bədii mütaliəsinə müsbət təsir edəcəyini xüsusi vurğulamışdır.Tədbirdə müəllim kollektivi,şagirdlərlə yanaşı valideyn komitə sədrləridə iştirak etmişlər.
Tədbirdə öncə Baba Vəziroğlunun həyat və yaradıcılığına həsr olunmuş videorolik göstərilmiş, aparıcı şairin lirik şeirlərində axıcılıq, səmimilik, yüksək poetikliyin olduğunu diqqətə çatdırılmışdır.
Görüşdə şairin sevilən əsərlərindən biri olan “Heydər xalqım söyləyəcək, xalq Heydər deyəcək” adlı musiqi kompozisiyası izlənilmişdir. Sonra şagirdlər mahnı sədaları altında şair Baba Vəziroğlunun şeirlərindən nümunələr söyləmiş, nəğməkar şairin sözlərinə bəstələnmiş mahnılar ifa etmişlər.
Faiq Sücəddinov pianinoda öz bəstələrindən və Baba Vəziroğlunun 44 günlük müharibə zamanı yazdığı şeirləri dinləyicilərinə təqdim etmişdir.
Sonra şair müəllim və şagird kollektivi qarşısında öz şeirlərini səsləndirmiş və şagird və müəllimlərin müxtəlif mövzulardakı suallarını ətraflı cavablandırmışdır.
Tədbirin sonunda şagird və müəllim kollektivi Baba Vəziroğlu və Faiq Sücəddinov ilə xatirə şəkilləri çəkdirmişlər
